सिन्धुली । केहि दिनदेखि सिन्धुली प्रशासनले जिल्लाका विभिन्न धार्मिक स्थलहरुमा निगरानी बढाएको छ । जिल्लाका गुम्बा, मस्जिद, मन्दिर, चर्च लगाएतका धार्मिक स्थलहरुमा निगरानी बढाईएको प्रमुख जिल्ला अधिकारी योगेन्द्र प्रसाद पाण्डेले बताए ।
उनका अनुसार कमलामाई नगरपालिका वडा नं. ८ को पैरेमा रहेको तपस्वी रामबहादुर बम्जनको आश्रम, कमलामाई नगरपालिकाको धुरा बजारमा रहेको मस्जिद, जिल्लाका विभिन्न ठाउँमा रहेका चर्च, मन्दिरमा निगरानी बढाईएको पाण्डेले बताएका छन ।
निगरानी गरिएका ती धार्मिक स्थलहरुमा हालसम्म जिल्ला बाहिरबाट कोहि पनि नआएको पाईएको छ । यस्तै बाहिर जिल्लाबाट आउने व्यक्तिहरुको निगरानीमा पनि स्थानीय प्रशासनले तदारुकता देखाएको जनाएको छ ।
छिमेकी जिल्ला रौतहट, विरगञ्ज र उदयपुरमा कोरोना संक्रमित भेटिन थालेपछि उच्च निगरानी गरिएको प्रमुख जिल्ला अधिकारी पाण्डेले बताएका छन ।
तराई जोड्ने भित्री सडक नै समस्या
सिन्धुलीको प्रहरीलाई भने जिल्लाका विभिन्न स्थानबाट नाका खोली बनाईएका सडकमा नै अहिले आवत जावत रोक्न समस्या भएको छ । सिन्धुली १० जिल्लाबाट घेरिएको र अधिकांश नाका जोडिने गरि सडक बनेको अवस्थामा सिन्धुलीका नाकामा निगरानी बढाउन सकस परेको छ । जनपथ प्रहरी शसस्त्र प्रहरी लगाएतका प्रहरी युनिटहरुलाई स्थानीय सरकारहरुसँग मिलेर खटाउँदा पनि आवत जावत रोक्न कहिले काहिं समस्या हुने गरेको जिल्ला प्रहरी कार्यालय सिन्धुलीका एसपी रञ्जु सिग्देलले बताएकी छिन । उनले भनिन, ‘विकासका नाममा बनाईएका सडक नै हाम्रा लागि चुनौती बनेका छन ।’
विपी राजमार्ग नै चुनौती
यस्तै विपी राजमार्ग पनि सिन्धुलीका लागि चुनौती बनिरहेको छ । विपी राजमार्ग हुदै दैनिक एकसय बढी सवारी साधन आवतजावत गर्ने गरेको प्रहरीकै तथ्यांक छ । बैशाख ३ गतेदेखि ६ गतेसम्म ४ सय १६ वटा सवारी साधन आवतजावत गरेको देखिएको छ ।
सिन्धुली भित्रिने सवारी साधन विशेष गरि काठमान्डौ जाने सवारी साधान रहेको प्रहरीले जनाएको छ । यो तथ्यांकमा अत्यावश्यक सवारी साधनहरु नराखिएको र नीजि सवारी साधान र खाद्यान्न तथा तरकारीका सवारी साधान रहेको चुरेमा चेकजाँचमा रहेका सशस्त्र प्रहरी युनिटका प्रमुख लक्ष्मण महतले बताए ।
