सिन्धुली । नेपाल आदिवासी जनजाति महासंघका केन्द्रीय अध्यक्ष जगत बरामले नेपालको संविधान अपुरो रहेकाले नमान्ने बताए ।
सिन्धुलीमाढीमा शनिबारबाट सुरु भएको नेपाल आदिवासी जनजाती महासंघ ३ नं. प्रदेश समन्वय परिषदको प्रथम अधिबेशनलाई संवोधन गर्दै उनले संविधान संशोधन गर्न माग गरे ।
संविधानको २७४ धारा खारेज गर्नुपर्ने उनको भनाई थियो । अहिलेको संविधानले आदिवासी जनजातीको भावना नबोकेकाले संविधान संशोधन नगरेसम्म आदिवासी जनजातीको नजरबाट यो संविधान अधुरै रहने बताए ।
तत्कालिन राज्य पुनःसंरचना आयोगले ११ वटा प्रदेश हुनु पर्ने भनेकोमा ११ वटै प्रदेश कायम गर्न संविधान संशोधन गर्नुपर्ने आवश्यकता रहेको उनले बताए उनले आदिवासी जनजातीहरुको पहिचान सहितको प्रदेश र नामाकरण गर्न समेत माग गरे ।
अहिलेको लोकसेवा आयोगले विस्तारै आदिवासी जनजातीहरुको आरक्षण हटाएर किनारा लगाउन खोजेको र एकल जाती, भाषा, पहिचानको देश वनाउन लागेको समेत आरोप लगाए । अहिलेको सरकारले आदिवासी जनजातीहरुको भेषभुषा, भाषा–संस्कृति मेटाउन लागेको आरोप उनको छ ।
अहिलेको संविधानमा धर्मनिरपेक्ष राष्ट्र भनिए पनि हिन्दु धर्म प्रमुख हुनेछ भनेर लेखिएकाले धर्म निरपेक्षताको परिभाषा समेत संशोधन हुनुपर्नेमा उनले जोड दिए ।
नेपाल आदिवासी जनजाति महासंघ ३ नं. प्रदेशका संयोजक काजीमान थिङ तामाङको अध्यक्षतामा अधिवेशनको उद्घाटनमा प्रदेश सांसद लोखनाथ दाहाल, प्रदिप कटुवाल, विनोदकुमार खड्का, बुद्धिमान माझी लगाएतले सम्बोधन गरेका थिए ।
उक्त अवसरमा प्रदेश सांसद लेखनाथ दाहालले ८२ प्रतिशत सांसदले संविधान स्वीकार गर्नु भनेको ८२ प्रतिशत जनताले संविधान स्वीकार गरेको भन्दै अहिलेको संविधान जनताको मतका आधारमा पनि संसारकै उत्कृष्ट संविधान भएको बताए । आइतबारसम्म चल्ने नयाँ कार्यसमितिको समेत चयन गर्ने छ ।
