सिन्धुली । नेपाल पत्रकार महासंघ बागमती प्रदेश समितिले रसुवास्थित भोटेकोशी नदीको भीषण बाढीबाट प्रभावित पत्रकार तथा उनीहरूका परिवारलाई आर्थिक सहयोग उपलब्ध गराएको छ ।
भदौ १० गते आएको विनाशकारी बाढीमा सबैभन्दा ठूलो पारिवारिक क्षति व्यहोरेका पत्रकार निराजन पौडेल सहित रसुवा, नुवाकोट र धादिङका प्रभावित पत्रकार तथा परिवारलाई शाखा मार्फत तथा प्रत्यक्ष भेटेर सहयोग रकम हस्तान्तरण गरिएको महासंघले जनाएको छ । रातोपाटी अनलाइनमा कार्यरत तथा नेपाल पत्रकार महासंघ रसुवा शाखाका सदस्य पौडेलले बाढीमा आफ्ना बुवा, आमा, काका, काकी र बहिनी गरी परिवारका पाँच सदस्य गुमाएका छन् । बाढीले उनको घर र सम्पत्ति समेत बगाएको छ । हाल उनी काठमाडौंको टोखामा आफन्तको किरियामा रहेका छन् ।
यस्तै महासंघले नुवाकोटका पत्रकार किरण अधिकारी, सन्नी श्रेष्ठ, धादिङका विपिन मल्ल तथा बाढीमा बेपत्ता भएका नुवाकोटका पत्रकार राजकुमार नेपालीका परिवारलाई पनि आर्थिक सहयोग प्रदान गरेको छ ।
महासंघ बागमती प्रदेश समितिले नुवाकोट शाखाका अध्यक्ष रामहरि गजुरेल, रसुवा शाखाका अध्यक्ष केशव पौडेल र धादिङ शाखाका अध्यक्ष सिताराम अधिकारी लगायतको समन्वयमा आर्थिक सहयोग गरेको महासंघका अध्यक्ष कृष्ण सारु मगरले बताए । महासंघले यो सहयोगलाई विपदको बेलामा आत्मवल बढाउने काम मात्र भएको बताएको छ ।
पत्रकारितामा पनि बाढीको असर
महासंघले बाढी तथा पहिरोबाट सञ्चारमाध्यममा परेको प्रभावका बारेमा अध्ययन समेत गरेको छ । महासंघले पत्रकारका घरपरिवार मात्र होइन, सञ्चारमाध्यमको नियमित काम काजमा समेत गम्भीर प्रभाव पारेको जनाएको छ । सडक अवरुद्ध, विद्युत् तथा इन्टरनेट सेवा अवरुद्ध हुँदा समाचार संकलन र सम्प्रेषणमा कठिनाइ भएको छ भने सञ्चार उपकरणमा समेत क्षति पुगेको उल्लेख गरिएको छ।
राहत वितरणका लागि बाढी प्रभावित क्षेत्र पुगेका अध्यक्ष मगरले विपद्को समयमा जोखिम मोलेर सूचना प्रवाह गरिरहेका पत्रकारको सुरक्षा, राहत, आवश्यक उपकरण तथा सुरक्षित कार्य वातावरण सुनिश्चित गर्न सम्बन्धित निकायलाई आग्रह गरेका छन् । साथै, विपद्बाट प्रभावित पत्रकारको पुनःस्थापना र बेपत्ता पत्रकारको खोजीमा महासंघ निरन्तर सक्रिय रहने प्रतिद्धता व्यक्त गर्दै सहयोगका लागि सबै पक्षसँग अपिल समेत गरेका छन् ।
