सिन्धुली । पछिल्ला तीन वर्षमा यौनजन्य हिंसाका १ सय ५ वटा घटना भएका छन् । जिल्ला प्रहरी कार्यालय सिन्धुलीले सार्वजनिक गरेको तथ्यांक अनुसार यौनजन्य हिंसाबाट सरदर बार्षिक ३५ वटा घटनाहरु हुने गरेको तथ्यांकले देखाएको छ । प्रहरीका अनुसार आर्थिक वर्ष २०८१/०८२ मा सबैभन्दा बढी ४१ वटा यौनजन्य हिंसाका घटना भएका छन् ।
त्यसैगरि आर्थिक वर्ष २०८०/०८१ मा ३१ वटा यौनजन्य हिंसाका घटना भएका थिए । कार्यालयको तथ्यांक अनुसार आर्थिक वर्ष २०८२/०८३ मा ३३ वटा यौनजन्य हिंसाका घटना भएका छन् ।
तीन वर्षमा जिल्लामा ६६ वटा बलात्कारका घटना भएका छन् । आर्थिक वर्ष २०८१/०८२ मा सबैभन्दा धेरै जसमा ३० वटा बलत्कारका घटना भएका थिए भने आर्थिक वर्ष २०८२/०८३ मा २६ र आर्थिक वर्ष २०८०/०८१ मा २० वटा घटना भएको जिल्ला प्रहरी कार्यालय सिन्धुलीका रविन्द्र बहादुर सिंहले जानकारी दिएका छन् ।
त्यस्तै बलत्कार प्रयासका २१ वटा घटना भएका छन् । आर्थिक वर्ष २०८१/०८२ मा १०, आ.व.२०८०/०८१ मा ८ वटा र २०८२/०८३ मा ३ वटा घटना भएको सिंहले जानकारी दिए ।
जिल्लामा पछिल्लो समय बालयौन दुव्र्यवहारका घटनामा पनि वृद्धि भएको छ । पछिल्लो ३ वर्षको अवधिमा ६ वटा बालयौन दुव्र्यवहारका घटना भएका छन् । आर्थिक वर्ष २०८२/०८३ मा मात्रै ४ वटा बालयौन दुव्र्यवहारका घटना घटेका छन् । आ.व. २०८१/०८२ मा र आ.व.२०८०/०८१ मा एक एक वटा बालयौन दुव्र्यवहारका घटना भएको प्रहरीको तथ्यांक छ । आर्थिक वर्ष २०८०/०८१ मा वैवाहिक बलत्कारका २ वटा घटना प्रहरीमा दर्ता भएका थिए । पछिल्ला वर्षमा भने बैवाहिक बलत्कारका घटना प्रहरीमा आएका छैनन् ।
