सिन्धुली । कमलामाई नगरपालिका वडा नंं ४ ढकालगाउँकी सारदा थापालाई ऋण नतिरेको भन्दै स्थानीयले शरीर बन्धक बनाई कुटपिट गरेको घटनामा सिन्धुली जिल्ला अदालतले सजाय निर्धारण गरेको छ ।
मंगलबार उनीहरुलाई सजाय तोकेको हो । उक्त काण्डमा पक्राउ परेका ७ जनामध्ये इश्वर पोखरेल, निकेश ढकाल, मिलन देवकोटा र एक्क बहादुर खड्कालाई ३ वर्ष कैद सजाय, ३०/३० हजार जरिवाना र पीडितलाई ५०/५० हजार रुपैंया क्षतिपूर्ति भराउने फैसला भएको हो ।
यस्तै विष्णुप्रसाद ढकाल, विरविक्रम ढकाल, सारदाका श्रीमान सन्तोष थापालाई १ वर्ष कैद सजाय, १०/१० हजार रुपैंया जरिवाना र पीडितलाई २०/२० हजार क्षतिपूर्ति भराउने फैसला भएको छ ।
उक्त घटनामा संलग्न दुईजनालाई सफाई दिईएको छ भने एकजना फरार रहेको सिन्धुली जिल्ला अदालतका श्रेष्तेदार चित्रखर अधिकारीले बताएका छन् । जिल्ला न्यायाधिस कमलराज विष्टको इजलासले मंगलबार सजाय निर्धारण गरेको थियो । उक्त काण्डमा लिलाकुमारी खड्का फरार छिन् ।
के हो सारदा थापा काण्ड ?
कमलामाई नगरपालिका वडा नंं ४ ढकालगाउँकी सारदा थापालाई ऋण नतिरेको भन्दै स्थानीयले शरीर बन्धक बनाई कुटपिट गरेका थिए । उनलाई २०८० पुस ६ गतेदेखि ८ गतेसम्म घरकै पिढीको खाँबो र विजुलीको पोलमा बाँधेर कुटपिट गरेको सन्दर्भमा तत्कालिन जिल्ला प्रहरी कार्यालय सिन्धुलीका एसपी राजकुमार सिलवालले उद्धार गरेका थिए । कुटपिटबाट अर्धचेत अवस्थामा उद्धार गरिएपछि उनलाई सिन्धुली अस्पतालमा उपचार गरिएको थियो । केहि समय उनलाई सुरक्षित आवास गृहमा समेत राखिएको थियो । तीनदिनसम्म खाना खान समेत नदिई कुटपिट गरिएको थियो ।
उनलाई उद्धार गर्दा सारदाको शरीरभरी निलडाम थियो । स्वास्थ्य जोखिमपूर्ण रहेको चिकित्सकहरुले सुझाएका थिए । पुस ७ गते एसपी सिलवालले उद्धार गर्दा उनलाई बेहोस अवस्थामा पोलमा बाँधेको, लडिरहेको र होस गुमेको अवस्थामा एसपी सिलवाले आफ्नै गाडीमा उद्धार गरि अस्पताल पु¥याएका थिए । तत्कालिन अवस्थामा आफुलाई बाँधेर मुक्का, लात्ती र लौरोले कुटपिट गरेको शारदाले प्रहरीलाई बयान दिएकी थिईन् ।
घटनामा संलग्न रहेको आरोपमा प्रहरीले स्थानीय इश्वरकुमार पोखरेल, मिलन देवकोटा, निकेश ढकाल, विष्णुकुमार ढकाल, विरविक्रम ढकाल, पीडितका श्रीमान सन्तोष थापा र एकबहादुर खड्कालाई तत्कालै पक्राउ गरेको थियो ।
पीडितले २०८० पुस ११ किटानी जाहेरी दिएकी थिईन् । पक्राउ परेका सातैजनालाई माघ १० गते सिन्धुली जिल्ला अदालतको आदेशमा पुर्पक्षका लागि कारागार चलान गरिएको थियो । पछि उनीहरु धरौटीमा रिहा भएका थिए । सारदामाथि ऋण लिएर काठमान्डौमा जग्गा जोडेको र ऋण तिर्नुपर्छ भनि श्रीमानसँग डिभोर्स गर्न खोजेको पीडक पक्षको आरोप थियो । सारदाका श्रीमान्ले स्थानीयसँग एक करोड २५ लाख ऋण लिएको पीडक पक्षको आरोप थियो ।
