सिन्धुली । तीनपाटन गाउँपालिकाले आगामी आर्थिक वर्ष २०८३/०८४ का लागि ८० करोड ६८ लाख ८१ हजार ६ सय ६० रुपैयाँ बराबरको बजेट सार्वजनिक गरेको छ । गाउँसभाको १८ औँ अधिवेशनमा प्रस्तुत गरिएको बजेटले पूर्वाधार विकास, कृषि उत्पादन वृद्धि, शिक्षा, स्वास्थ्य, रोजगार प्रवद्र्धन तथा सेवा प्रवाहको गुणस्तर अभिवृद्धिलाई केन्द्रमा राखेको छ ।
बुधबार गाउँपालिकाको सभाहलमा सुरु भएको अधिवेशन गाउँपालिका अध्यक्ष कर्णबहादुर मगरको अध्यक्षतामा सम्पन्न भएको हो । अधिवेशनको पहिलो बैठकमा अध्यक्ष मगरले आगामी आर्थिक वर्षको वार्षिक नीति तथा कार्यक्रम प्रस्तुत गर्दै स्थानीय स्रोत, सम्भावना र आवश्यकतालाई आधार बनाएर समृद्ध तीनपाटन निर्माणतर्फ बजेट केन्द्रित गरिएको जानकारी गराएका थिए ।
त्यसैगरी उपाध्यक्ष धनबहादुर पुलामी ‘अशोक’ले आर्थिक वर्ष २०८३/०८४ को आय–व्यय अनुमान, विनियोजन विधेयक, २०८३ तथा आर्थिक विधेयक, २०८३ गाउँसभा समक्ष पेश गरेका थिए । प्रस्तुत बजेट तथा नीति–कार्यक्रममाथि गाउँसभा सदस्यहरूबीच छलफल गरी आगामी बैठकबाट पारित गरिने कार्यसूची तय गरिएको प्रमुख प्रशासकिय अधिकृत मनोज शाहले बताए ।
अधिवेशनका अवसरमा गाउँपालिकाले शैक्षिक उत्कृष्टतालाई प्रोत्साहन गर्ने उद्देश्यले सामुदायिक विद्यालयका दुई उत्कृष्ट विद्यार्थीलाई ल्यापटप प्रदान गरी सम्मान गरेको छ । शैक्षिक सत्र २०८२ मा कक्षा ८ को परीक्षामा सर्वाधिक अंक प्राप्त गरेका भवानी माध्यमिक विद्यालय, भिमस्थानका अर्जुन जोगी तथा माध्यमिक विद्यालय, मझुवा दोभानकी प्रेरणा पहाडीलाई गाउँपालिकाले एक–एक थान ल्यापटप प्रदान गरेको हो । यस कदमलाई सामुदायिक विद्यालयमा अध्ययनरत विद्यार्थीहरूमा प्रतिस्पर्धात्मक भावना र अध्ययनप्रतिको उत्साह अभिवृद्धि गर्ने प्रयासका रूपमा हेरिएको छ ।
यस्तै, सुशासन र उत्तरदायी प्रशासनलाई प्रोत्साहन गर्ने उद्देश्यले आर्थिक वर्ष २०८२/०८३ को कार्यसम्पादन मूल्याङ्कनका आधारमा उत्कृष्ट कर्मचारीहरूलाई पनि सम्मान गरिएको छ । नरमाया तामाङ, वीरेन्द्र केसी, नवीन सिदाली, अभिषेक मानन्धर, करिष्मा कुमारी पूर्वछाने, कल्पना कुमारी मगर तथा ज्ञानबहादुर रुवाले मगरलाई सर्वोत्कृष्ट कर्मचारी घोषणा गर्दै आधा महिनाको तलब बराबरको नगद पुरस्कार तथा सम्मानपत्र प्रदान गरिएको छ ।
स्थानीय सरकारको विकास यात्रामा नीति, कार्यक्रम र बजेटसँगै कार्यसम्पादनमा उत्कृष्टता हासिल गर्ने जनशक्ति र विद्यार्थीलाई सम्मान गर्ने अभ्यासले तीनपाटन गाउँपालिकाले सुशासन, गुणस्तरीय शिक्षा र नतिजामुखी सेवा प्रवाहप्रति आफ्नो प्रतिबद्धता पुनः पुष्टि गरेको छ। आगामी आर्थिक वर्षको बजेट कार्यान्वयनसँगै गाउँपालिकाले विकास र सेवा वितरणका क्षेत्रमा थप प्रभावकारी परिणाम हासिल गर्ने अपेक्षा गरिएको छ ।
