सिन्धुली । कमलामाई नगरपालिकाले नगरपालिका भित्रका सार्वजनिक जग्गामा बनेका अवैध भौतिक संरचनाहरु हटाउने निर्णय गरेको छ ।
नगरपालिकाको बुधबार सिन्धुलीमाढीमा बसेको १८५ औं कार्यपालिका बैठकले नगरपालिका भित्रका सडक, सार्वजनिक स्थल, नदी क्षेत्र, बसपार्क क्षेत्र, हाट बजार, विद्यालय क्षेत्र वा सार्वजनिक क्षेत्रमा जग्गा अतिक्रमण गरि बनेका भौतिक संरचना हटाउने निर्णय गरेको हो ।
नगरपालिकाभित्रका सार्वजनिक जग्गामा बनेका र नगरपालिकाबाट अनुमति नलिई बनाईएका संरचनाहरु भत्काउने निर्णय भएको कमलामाई नगरपालिका सिन्धुलीले जनाएको छ ।
नगरपालिकाले भुकम्पपछि रातो स्टिकर प्राप्त अर्थात जोखिमपूर्ण सार्वजनिक भवनहरु समेत भत्काउने निर्णय गरेको छ । त्यसको पहिलो निशानामा स्टलबजार पर्ने छ ।
नगरपालिकाले ३५ दिने सूचना जारी गर्ने र सम्बन्धित पक्षले आफै अतिक्रमण भएका क्षेत्रका संरचना नहटाए नगरपालिकाले भत्काउन सुरु गर्ने तयारी रहेको नगरपालिकाका प्रमुख प्रशासकीय अधिकृत किरण निधी तिवारीले बताएका छन् । कानुनी प्रक्रिया पुरा गरि संरचना हटाउन नगरपालिका एक्सनमा गएको पनि उनले जानकारी दिए ।
