सिन्धुली । जिल्लामा नौ महिनाको अवधिमा त्रियानब्बे जना महिला घरमै सुत्केरी भएका छन् । सबैभन्दा बढी दुधौली नगरपालिकामा महिलाहरु घरमै सुत्केरी भएका छन् । दुधौलीमा नौ महिनामा २६ जना महिला घरमै सुत्केरी भएका छन् । मरिण गाउँपालिकामा, २२ जना, हरिहरपुरगढी गाउँपालिकामा १५ जना, घ्याङलेख गाउँपालिकामा १२ जना महिला घरमै सुत्केरी भएको जनस्वास्थ्य कार्यालय सिन्धुलीको तथ्यांक रहेको छ ।
यस्तै कमलामाई नगरपालिकामा ६ जना, फिक्कलमा ५ जना, तिनपाटनमा ४ जना, सुनकोशीमा २ जना र गोलञ्जोरमा एक जना महिला घरमै सुत्केरी भएको जनस्वास्थ्य कार्यालय सिन्धुलीका प्रमुख विमल पटेलले जानकारी दिए ।
उनले बुधबार सिन्धुलीमाढीमा पत्रकारहरुसँग अन्तक्र्रिया गर्दै उनले यस्तो जानकारी दिएका हुन । पटेलका अनुसार जिल्लामा घरमै सुत्केरी हुने क्रम नरोकिएको र गम्भिर समस्याका रुपमा रहेको बताएका छन् ।
उनले जिल्लामा बालविवाह पनि बढेको बताएका छन् । उनले नौ महिनामा २० वर्ष मुनीका १४९ जना महिलाले बच्चा जन्माएको बताउँदै बालविवाहको विकराल रुप रहेको जानकारी दिएका छन् । बालविवाह पनि जिल्लाभरी नै रहेको उनले बताए ।
बागमती प्रदेश स्वास्थ्य निर्देशनालय र जनस्वास्थ्य कार्यालय सिन्धुलीको आयोजनामा भएको कार्यक्रममा आर्थिक वर्ष २०८२/०८३ मा सम्पादन गरिएको कामको जानकारी दिन गरिएको कार्यक्रममा सिन्धुली अस्पताल सिन्धुली, आयुर्वेद तथा वैकल्पिक चिकित्सालय सिन्धुली र जनस्वास्थ्य कार्यालयको चालु आर्थिक वर्षको हालसम्म गरिएका कार्य प्रगतिको समिक्षा गरिएको थियो ।
जनस्वास्थ्य कार्यालयका प्रमुख बिमल पटेलको अध्यक्षतामा भएको कार्यक्रममा सिन्धुली अस्पतालका प्रमुख सुशान्त कुमार खड्काले अस्पतालद्वारा प्रदान गरिएका सेवा तथा सुविधा, हालसम्मका उपलब्धि प्रगति तथा सुधारका प्रयासहरूको विषयमा प्रशिक्षण गराएका थिए । त्यस अस्पताल प्रशासनमा भएका विद्यमान चुनौती तथा समस्याबारे पनि जानकारी गराएका थिए । यस्तै आगामी योजना तथा लक्ष्य सुधारका रणनीतिहरू, स्वास्थ्य सेवाप्रति जनविश्वास अभिवृद्धि पारदर्शिता तथा उत्तरदायित्व सुनिश्चितता र नागरिक सहभागिता तथा सहयोग अभिवृद्धि गर्न भएका प्रयासहरूको बारेमा चर्चा गरेका थिए ।
यस्तै आयुर्वेद तथा वैकल्पिक चिकित्सालय सिन्धुलीका प्रमुख दीपकराज तिमल्सिनाले आर्थिक वर्ष २०८२/०८३ को प्रमुख उपलब्धिहरू, यस आर्थिक वर्षमा भएका कार्यक्रमको प्रगति तथा कार्यक्रमका प्रमुख समस्या, चुनौती र समस्याको विषयमा जानकारी दिएका थिए । अन्तरक्रिया कार्यक्रमको सहजीकरण जनस्वास्थ्य कार्यालय सिन्धुलीका खोप निरीक्षक पुष्पराज पन्तले गरेका थिए ।
