सिन्धुली । बहिरा अपांगता भएका विद्यार्थीहरुका लागि नसर्ने रोग न्युनिकरणका लागि खाने बानीमा सुधार सम्बन्धि एक दिने सचेतना कार्यक्रम गरिएको छ । बुधबार खाद्य प्रविधि तथा गुण नियन्त्रण डिभिजन कार्यालय, सिन्धुलीले नवज्योती बहिरा माध्यमिक बिद्यालय कमलामाई ६, सिन्धुलीमा अध्ययनरत बहिरा विद्यार्थीहरुका लागि उक्त कार्यक्रम गरेको हो ।
उक्त कार्यक्रममा खाद्य प्रविधि तथा गुण नियन्त्रण डिभिजन कार्यालय सिन्धुलीका प्रमुख दिनेश सुवेदीले नसर्ने रोग, यसका कारण, न्यूनिकरणका उपायहरु, दैनिक जीवनमा अपनाउनु पर्ने असल खाद्य व्यवहार सम्बन्धि विषयमा जानकारी गराएका थिए भने खाद्य निरीक्षण अधिकारी अतिस घिमिरेले खाद्य स्वच्छता कायम गर्न अपनाइने उपायहरु, व्यक्तिगत सरसफाई, प्रशोधित खाद्य पदार्थ र यसले बालबालिकामा पार्ने सक्ने असर, कुपोषण र सन्तुलित आहार कसरी तयार गर्ने, लेबल विवरण कसरी अध्ययन गर्ने जस्ता विषयहरुका बारेमा सहजीकरण गरेका थिए ।
कार्यक्रममा विद्यालयमा कक्षा ६ देखि कक्षा १२ सम्म अध्ययनरत बहिरा विद्यार्थी, शिक्षक तथा कर्मचारीहरु गरि करिब ८० जनाको सहभागिता रहेको थियो ।
कार्यक्रममा भिन्न क्षमता भएका बिद्यार्थीहरुलाई बुझ्न सहज हुने सुचना सन्देश सामग्री ब्रोसर, फ्लेक्स, पम्प्लेट सहित प्रस्तुतिकरण गरिएको थियो । उनीहरुलाई सांकेतिक भाषा मार्फत बुझाउने व्यवस्था समेत गरिएको थियो ।
यस्तै विद्यालयले सञ्चालन गरिरहेको क्यान्टिनको समेत अनुगमन गरिएको कार्यालय प्रमुख सुवेदीले बताएका छन् । अनुगमन पश्चात खाद्य स्वच्छता कायम गर्न, सन्तुलित आहार तयार गर्न, खाद्य पदार्थको उचित भण्डारण र व्यवस्थापन गर्न आवश्यक प्राविधिक सल्लाह र परामर्श समेत उपलब्ध गराइएको उनले बताए ।
नवज्योति बहिरा माध्यमिक विद्यालयका प्रधानाध्यापक विजय तामाङले खाद्य प्रविधि तथा गुण नियन्त्रण डिभिजन कार्यालय सिन्धुलीले फरक क्षमताका बिद्यार्थीहरुलाई आफ्नो कार्यक्रममा समेटी दैनिक जीवनमा अत्यावश्यक जानकारीहरु र परामर्श उपलब्ध गराएकोमा धन्यवाद व्यक्त गरेका छन् ।
