सिन्धुली । तीनपाटन गाउँपालिका वडा नं. १ बेलघारीमा रहेको झोलुङ्गे पुलको करीब सय मिटर नजिकै कार्तिक २१ गते एक महिलाको शव भेटियो । शव थियो तीनपाटन गाउँपालिका वडा नं २ पहिरेकी ४० वर्षिय छत्रकुमारी कार्की (थापा) को । १७ गतेदेखि हराएकी उनको शव इलाका प्रहरी कार्यालय बेलघारीको करीब ३ सय मिटर नजिक भेटियो । प्रहरीले महिला हराएको सूचना त पायो तर लाश भेट्टाउन सकेन । घाँस काट्न गएका स्थानीयले पाँचौ दिनमा शव भेटे र प्रहरीलाई खबर गरे । दाहिने हातका तीनवटा औंला काटिएको, पाठेघर बाहिर निकालिएको, घाँटीमा सलले कसिएको, सोहि सलले मुख छोपिएको, एउटा स्तन काटिएको क्षतविक्षत अवस्थामा छत्रकुमारीको शव भेटियो । प्रहरीले अनुसन्धान थाल्यो ।
घटनामा संलग्न दुई जनालाई पक्राउ पनि ग¥यो । त्यो सँगै उनको हत्या दिउँसै भएको समेत पहिचान ग¥यो । तीन छोराहरुकी आमा उनको हत्या विवाहेत्तर सम्बन्धका कारण भएको समेत प्रहरीले कारण खुलायो । हत्यामा संलग्न रहेका दुधौली नगरपालिका वडा नं. १३ का ३१ वर्षिय सुरज भन्ने सूर्य बहादुर कामी र उनकै भाञ्जा दुधौली नगरपालिका वडा नं. १३ का २० वर्षिय टंक बहादुर कामी पक्राउ गरेको जिल्ला प्रहरी कार्यालय सिन्धुलीले जानकारी दिएको छ । सुर्य बहादुरलाई दाङको लमही बसपार्कबाट र टंक बहादुरलाई दुधौली नगरपालिका वडा नं. ९ बाट नियन्त्रणमा लिइएको र आवश्यक अनुसन्धान सुरु गरिएको एसपी लालध्वज सुवेदीले गत विहिबार पत्रकार सम्मेलन गरि बताएका छन् ।
दुधौली नगरपालिका वडा नं. २ मा रहेको मधुगंगा महादेव मन्दिर नजिकै कालिडाँडामा गएको साउन ५ गते भारतीय नागरिकको गोली हानी हत्या भयो । बन्दुक समाएर फोटो खिच्ने क्रममा बन्दुकले छातीमा गोली लाग्यो । उक्त घटनामा गोली चलाउने एक जना भारतिय नागरिक र अनुमति विना भरुवा बन्दुक राख्ने दुई जना गरि तीन जनालाई प्रहरीले पक्राउ ग¥यो । स्थानीय विष्णु बहादुर घिसिङको घरमा रहेको भरुवा बन्दुक प्रयोग गरि भारतको सितामढी जिल्लाको भवदेपुर वडा नं. ११ का २५ वर्षिय पंकज कुमार भगतको उनकै नजिकका साथीबाट हत्या भएको थियो । बन्दुक धनी विष्णु बहादुर घिसिङ, उनकी श्रीमति तिलमाया घिसिङ र भारतको सितामढी जिल्लाको भवदेपुर वडा नं. ११ का अविनिस कुमार दासलाई पक्राउ गरियो । तिलमायालाई साउन ६ गते, विष्णुलाई साउन ७ गते र दासलाई साउन १४ गते प्रहरी पक्राउ गरि मुद्दा चलायो । उनीहरुलाई हातहतियार, खरखजना तथा हत्या अभियोगमा मुद्दा दर्ता चलाएको प्रहरीले जनाएको छ । उक्त मुद्दा अदालत गईसकेको छ । पोष्ट मार्टममा गोलीको छर्रा समेत भेटिएको थियो । गोली हानेपछि गोली निकाल्ने प्रयासका बाबजुद मृतकको छातीभित्र चक्कु, कचिया समेत प्रयोग गरेको अनुसन्धानले खुलाएको थियो । प्रहरीले चक्कु, कचिया र भरुवा बन्दुक समेत बरामद गरेको थियो ।
दुधौली नगरपालिकाको भौंडीमा गत भदौ १५ गते आफ्नै छोराले आमाको हत्या गरे । जग्गाको अंश विवादमा दुधौली नगरपालिका वडा नं. १४ भौडीकी ६५ वर्षिय फाल कुमारी सुनुवारको जेठा छोरा ४० वर्षीया तुलाराज सुनुवारले गलले हानेर हत्या गरे । तुलाराजले आमाको घरमा आई आमालाई निधारमा हानेर हत्या गरेका थिए । मृतक सुनुवार माईली बुहारीसँग बस्दै आएकी थिईन । आमासँग छुट्टिएर बसेका तुलाराजले मदिरा सेवन गर्ने र अंश माग्दै आमासँग पटक पटक घरझगडा गर्दै आएको खुलेको प्रहरीले जनाएको छ । आमा ढलिसकेपछि सुँगुरलाई घोच्ने सुईरोले आमाको पेटमा घोँचेर घाउ समेत बनाएको देखिएको प्रहरीले जनाएको थियो । आमाको हत्या गरेर भाग्दै गर्दा तुलाराजलाई प्रहरी र स्थानीयको सहयोगमा पक्राउ गरिएको थियो । उक्त घटनामा तुलाराजलाई असोज २ गते नै पुर्पक्षका लागि थुनामा पठाईएको छ ।
कमलामाई नगरपालिका–६ पानीट्यांकीका ५५ वर्षीय बुद्धसिंह वाइबालाई उनकी श्रीमती ४८ वर्षीया राधिका वाइबाले हत्या गरिन् । घरायसी विवाद हुँदा टाउकोमा ढुंगाले प्रहार गरि उनको हत्या गरिन । घाईते वुद्धसिंहको उपचारको क्रममा मृत्यु भयो । राधिका अहिले प्रहरी नियन्त्रणमा छिन् ।
यी प्रतिनिधि घटनाहरुले सिन्धुलीमा जघन्य हत्या हुने गरेको तथ्य खुलाएका छन् । चार महिनाको अवधिमा जिल्लामा एघार वटा यस्ता हत्याका घटना भएका छन् । सिन्धुलीमा पछिल्लो समय व्यक्ति हत्याका घटना बढ्दै गएको प्रहरीले जनाएको छ । जिल्ला प्रहरी कार्यालय सिन्धुलीका डिएसपी सूर्यप्रकाश सुवेदीका अनुसार चार महिनामा हत्याका ११ वटा घटना भएका छन् ।
घटनाहरु घरायसी विवाद, मदिरा सेवन, आर्थिक लेनदेन लगाएतका कारणहरुले हुने गरेको पाईएको डिएसपी सुवेदीले बताएका छन् । हत्यामा संलग्नमध्ये हालसम्म ७ जना पक्राउ परेका छन् । घटनामा संलग्न अभियुक्त बालक, महिला र पुरुष रहेका छन् । यसले हत्यामा संलग्न जुनसुकै व्यक्ति पनि हुन सक्ने देखाएको छ ।
