सिन्धुली । नेकपा एमाले सिन्धुलीले जेनजीको आन्दोलनका क्रममा आन्दोलनकारीले आगजनी गरि जलाएको पार्टी कार्यालय भवन सिन्धुलीमाढीमा उभिएरै बैठक सम्पन्न गरेको छ । एमालेको कार्यालय र कार्यालयमा भएका सबै फर्निचर तथा सामग्रीहरु जलेपछि एमालेले शुक्रबार जिल्ला कमिटीको बैठक भग्नाशेष कार्यालयमै उभिएर सम्पन्न गरेको हो ।
संविधान दिवसको अवसरमा आयोजित जिल्ला कमिटी सिन्धुलीको सातौं बैठक उभिएरै सम्पन्न गरिएको नेकपा एमाले सिन्धुलीका अध्यक्ष महेन्द्रदेव श्रेष्ठले बताएका छन ।
आगजनीबाट अत्यधिक क्षति व्यहोरेको पार्टी कार्यालयको हलभित्र पार्टीको जिल्ला कमिटी बैठक गरि जेनजी आन्दोलनमा मृत्यु भएकाहरुप्रति श्रद्धाञ्जली व्यक्त गर्दै शोक प्रस्ताव समेत पारित गरिएको छ भने आन्दोलनका क्रममा घाईते भएकाहरुप्रति स्वास्थ्य लाभको कामना समेत गरिएको छ ।
यस्तै एमालेले जेनजी आन्दोलनका क्रममा भएको सार्वजनिक तथा नीजि सम्पत्ति क्षतिप्रति दुःख व्यक्त गरेको छ । यस्तै जिल्लामा भएको क्षतिको विवरण संकलन गर्ने निर्णय समेत एमालेले गरेको छ । आन्दोलनका क्रममा भएको तोडफोड, आगजनी र लुटपाटको घटनाको छानविन गर्न एमालेले छानविन समिति समेत गठन गरेको छ ।
यस्तै बैठकले तोडफोड र आगजनीमा संलग्नलाई कारवाहि गर्न सरकारसँग माग गर्ने निर्णय समेत गरेको छ । नेकपा एमाले सिन्धुलीका अध्यक्ष महेन्द्रदेव श्रेष्ठको अध्यक्षता तथा केन्द्रीय सदस्य गणेश कुमार पहाडीको प्रमुख आतिथ्यतामा बैठक सम्पन्न भएको हो ।
बैठकमा सहभागि नेता, कार्यकर्ताहरुले संविधान दिवसको अवसरमा पार्टी कार्यालयमा नेपालको राष्ट्रिय झण्डा र पार्टीको झण्डा समेत फहराएका छन ।
