सिन्धुली । सिन्धुलीका बाढी पीडितलाई नेकपा एमाले मधेश प्रदेशले राहत उपलब्ध गराएको छ । नेकपा एमाले जिल्ला कमिटी सिन्धुलीको समन्वयमा जिल्लाका बाढी पीडितलाई राहत उपलब्ध गराएको हो ।
नेकपा एमाले स्थायी कमिटी सदस्य एवम् मधेश प्रदेशका इन्चार्ज लिला श्रेष्ठ, मधेश प्रदेश सरकारका भौतिक पूर्वाधार विकास मन्त्री सरोज यादव, नेकपा एमालेका अध्यक्ष चन्देश्वर मण्डल लगाएतको उपस्थितिमा नेकपा एमाले सिन्धुलीलाई उक्त राहत उपलब्ध गराएका हुन ।
नेकपा एमाले सिन्धुली मार्फत रोशी र कोशीको बाढीबाट प्रभावित भई घरबार विहिन भएका सुनकोशी गाउँपालिका, गोलञ्जोर गाउँपालिका र फिक्कल गाउँपालिकाका बाढी पीडितलाई उपलब्ध गराउने गरि राहत उपलब्ध गराईएको हो ।
नेकपा एमाले मधेश प्रदेशले ६ हजार किलो चामल, ६ सय किलो दाल र ३ सय किलो नुन उपलब्ध गराएको हो । एमाले सिन्धुलीका जिल्ला इन्चार्ज मनोजजंग थापा, नेकपा एमाले केन्द्रीय सदस्य कमलजंग राई, प्रदेश कमिटी सदस्य विनोद खड्का, जिल्ला अध्यक्ष महेन्द्रदेव श्रेष्ठ सहितका नेताहरुको उपस्थितिमा उक्त राहत हस्तान्तरण गरिएको हो ।
नेकपा एमाले सिन्धुलीका अध्यक्ष महेन्द्रदेव श्रेष्ठले बाढी पीडितहरुलाई राहत उपलब्ध गराएकोमा मधेश प्रदेश कमिटीलाई धन्यवाद व्यक्त गरेका छन । उनले उक्त राहत मंगलबार नै बाढी पीडित क्षेत्रमा पुगेर वितरण गरिने समेत जानकारी दिएका छन ।
