सिन्धुली । बागमती प्रदेश सरकारको ड्रिम प्रोजेक्ट मानिएको ‘अत्याधुनिक सुरक्षा चेकजाँच पोष्ट’ बागमति प्रदेशका दुई स्थानमा निर्माण गरिने भएको छ । विपी राजमार्ग अन्तर्गत कमलामाई नगरपालिका ९ सिन्धुलीको भिमान र पूर्व पश्चिम राजमार्ग अन्तर्गत मकवानपुरको रातामाटेमा अत्याधुनिक सुरक्षा चेकपोष्ट निर्माण हुने भएको हो । यी चेकपोष्ट नेपालकै नमुना र अत्याधुनिक चेक पोष्ट हुनेछन ।
चेकपोष्ट निर्माणका लागि डिपिआर, आईईई भईसकेको छ भने जग्गा प्राप्तीको काम अगाडि बढाईएको छ । सिन्धुलीको भिमानमा निर्माण हुने चेकपोष्टका लागि आवश्यक जग्गा प्राप्ती गर्न आन्तरिक मामिला तथा कानुन मन्त्रालयले छलफल अगाडि बढाएको जनाएको छ ।
जग्गा प्राप्तीका सन्दर्भमा आन्तरिक मामिला तथा कानुन मन्त्री सुरजचन्द्र लामिछाने, मन्त्रालयका सचिव पूर्ण बहादुर दर्जी लगाएतको टोलीले कमलामाई नगरपालिका वडा नं. ९ भिमानका स्थानीयहरु, कमलामाई नगरपालिकाका मेयर उपेन्द्र कुमार पोखरेल, कमलामाई नगरपालिका वडा नं. ९ का अध्यक्ष विनोद प्रधान, मालपोत कार्यालय, नापी कार्यालय, डिभिजन वन कार्यालयका प्रमुख तथा प्रतिनिधिहरु लगाएतसँग विहिबार छलफल गरेको छ ।
छलफलमा संविधानसभा सदस्य मोहन बराल, सिन्धुलीका प्रमुख जिल्ला अधिकारी लिलाप्रसाद शर्मा, जिल्ला प्रहरी कार्यालय सिन्धुलीका एसपी गोविन्दराज काफ्ले लगाएतको सहजीकरण रहेको थियो ।
करीव ३ करोड लागतमा विपी राजमार्ग र मदनभण्डारी राजमार्गको संगम स्थल भिमानमा बनाउन थालिएको चेकपोष्ट निर्माण सुरु भएको एक वर्षमा सम्पन्न हुने गरि निर्माण गरिने छ ।
स्क्यानिङ गरेर सवारी साधनहरुको चेकजाँच गरिने गरि सुरक्षा चेकजाँच पोष्ट निर्माण हुने छ । जसमा अत्याधुनिक प्रविधिको जडान गरिने छ । चेकपोष्ट निर्माणले राजस्व छली रोक्ने, राजस्व संकलनमा वृद्धि हुने, चोरी तस्करी नियन्त्रण हुने अनुमान गरिएको जिल्ला प्रहरी कार्यालय सिन्धुलीका प्रहरी प्रमुख एसपी गोविन्दराज काफ्लेले बताए । चेकपोष्ट निर्माणपछि चेकपोष्टको नियमन नेपाल प्रहरीले गर्नेछ ।
छलफलका क्रममा आन्तरिक मामिला तथा कानुन मन्त्रालयका सचिव पूर्ण बहादुर दर्जीले यी दुईवटा चेकपोष्ट निर्माण भएपछि राजमार्ग क्षेत्रमा सवारी सुरक्षा चेकजाँच व्यवस्थित हुनुका साथै वागमती प्रदेशको राजस्व २ देखि ३ अर्व वृद्धि हुने अनुमान गरिएको बताए । यो योजना निर्माणले बागमती प्रदेशको दीर्घकालिन आर्थिक श्रोत समेत वृद्धि हुने उनले बताएका छन । विगतका वर्षदेखि आयोजनाको काम अगाडि बढाउने प्रयास भएको समेत सचिव दर्जीले जानकारी दिए ।
भिमानमा चेकजाँच पोष्ट निर्माणका लागि १८ कठ्ठा जग्गा आवश्यक रहेको मन्त्रालयले जनाएको छ । छलफलमा प्रमुख जिल्ला अधिकारी लिलाप्रसाद शर्माले जग्गा प्राप्तीको प्रक्रियाका बारेमा स्थानीयलाई जानकारी गराएका थिए ।
