सिन्धुली । नेकपा एमालेका कार्यवाहक अध्यक्ष इश्वर पोखरेलले संविधानको मूल मर्मलाई कुल्चिन नदिईकन सहमतिका आधारमा संविधान संशोधन हुने बताएका छन । प्रेस चौतारी नेपाल सिन्धुलीले सोमबार सिन्धुलीमाढीमा आयोजना गरेको पत्रकार सम्मेलनमा बोल्दै पोखरेलले संघियता, गणतन्त्र, समावेशीतालाई कमजोर बनाउने, सामानुपातिक सहभागितालाई कमजोर बनाउने गरि संविधान संशोधन गर्न एमालेले नदिने बताएका छन ।
पोखरेलले संविधान संशोधन गर्न आवश्यकता अनुसार गर्न सकिने बताउँदै पोखरेलले संविधान जारी भएपछि गरिएका अभ्यासमा केहि विवाद, समस्याहरु देखिएका कारण संविधान संशोधन आवश्यक रहेको बताए ।
उनले संविधान संशोधन गर्दा कुन विधिबाट गर्ने र कुन कुन विषयमा गर्ने विषय महत्वपूर्ण रहेको बताए । उनले संविधान संशोधन गर्दा नेपालका सबै राजनीतिक दलहरुसँग सहमति गरेर मात्र गरिने बताएका छन ।
नेकपा एमाले सिन्धुलीले आयोजना गरेको प्रशिक्षण कार्यक्रममा प्रशिक्षण दिन आएका पूर्व उपप्रधानमन्त्री समेत रहेका पोखरेलले संविधान संशोधन विशेष गरि शासकीय स्वरुप, निर्वाचन प्रणाली, न्यायपालिकाका विषय, संवैधानिक अंगसँग सम्बन्धित विषय, स्थानीय निकाय सञ्चालन, प्रदेश संरचना लगाएका विषयमा संविधान संशोधनको आवश्यकता देखिएको बताएका छन ।
संविधान संशोधनका विषयमा दलहरु एक ठाउँमा उभिनुपर्ने बताउँदै पोखरेलले कन्टेन्ट र प्रोसेसमा कसरी जाने भनेर सहमति जुट्न आवश्यक रहेको बताए ।
उनले भने, संविधानमा संशोधन आवश्यक पर्दा नेकपा एमाले खुल्ला छ । यो कुनै एउटा पार्टीको पेवा विषय हैन, छलफल गरेर अन्तरवस्तुमा पुगेर प्रक्रियाबाट निश्कर्ष निकाल्नुपर्छ ।’
गठबन्धन २०८४ सम्म रहन्छ ? भन्ने पत्रकारहरुको प्रश्नमा पोखरेलले यो गठबन्धन देशको आवश्यकताले भएको गठबन्धन भएकाले देशको निकासका लागि रहिरहन आवश्यक रहेको बताए । गठबन्धन कहिलेसम्म रहने भन्ने प्रश्न नगरि हेर्दै जना पनि उनले आग्रह गरेका छन । उनले अहिलेको गठबन्धन राष्ट्रिय संकट समाधान गर्न बनेको भन्दै गठबन्धन नरहेमा देशको लागि नै दुर्भाग्य हुने उनले दावी गरे ।
