सिन्धुली । मरिण गाउँपालिकाको उपभोक्ता हित संरक्षण समितिले बजार अनुगमनका क्रममा म्याद नाघेका खाद्य तथा उपभोग्य वस्तु जफत गरी नष्ट गरेको छ।
गाउँपालिकाको वडा नं. ६ अन्तर्गत धमिले बजार, भुताहा, नयाँबस्ती बजारलगायत क्षेत्रमा गरिएको अनुगमनका क्रममा ३३ वटा पसल तथा व्यावसायिक प्रतिष्ठानको निरीक्षण गरिएको हो।
उपभोक्ता हित संरक्षण समितिकी संयोजक विमला माझीको संयोजकत्वमा भएको अनुगमनमा किराना, मासु, हार्डवेयर, कपडा, मेडिकल, शैलुन, सुनचाँदी, चप्पल पसल तथा होटललगायत व्यवसायको अनुगमन गरिएको गाउँपालिकाले जनाएको छ।
अनुगमनका क्रममा व्यवसाय दर्ता तथा नवीकरण, मूल्यसूची, वस्तुको गुणस्तर र म्याद, खाद्य वस्तुको लेबलिङ, सरसफाइ तथा उपभोक्ता हितसम्बन्धी कानुनको पालना भए–नभएको निरीक्षण गरिएको थियो। कमी–कमजोरी देखिएका व्यवसायीलाई सुधारका लागि आवश्यक निर्देशन तथा सुझावसमेत दिइएको छ।
अनुगमनका क्रममा तीन वटा पसल तथा व्यावसायिक प्रतिष्ठानमा बिक्रीका लागि राखिएका म्याद नाघेका खाद्य तथा उपभोग्य वस्तु फेला परेका थिए। ती वस्तु एमआरपी मूल्यका आधारमा ४२ हजार ७ सय ३८ रुपैयाँ बराबरका रहेको गाउँपालिकाले जनाएको छ। जफत गरिएका वस्तुहरू इलाका प्रहरी कार्यालय कपिलाकोटको रोहवरमा नष्ट गरिएको छ।
गाउँपालिकाले मरिण क्षेत्रका व्यवसायीलाई म्याद ननाघेका तथा गुणस्तरीय वस्तु बिक्री–वितरण गर्न, उचित मूल्य कायम गर्न र अनिवार्य रूपमा मूल्यसूची राख्न आग्रह गरेको छ। साथै पसल तथा व्यावसायिक स्थल सफा र व्यवस्थित राख्न, व्यवसाय दर्ता तथा नवीकरण अद्यावधिक गर्न र उपभोक्ताको हितलाई प्राथमिकतामा राखेर व्यवसाय सञ्चालन गर्न अनुरोध गरेको छ।
बजार अनुगमनमा उद्योग वाणिज्य संघ मरिण शाखा, इलाका प्रहरी कार्यालय कपिलाकोट, व्यवसायी तथा सञ्चारकर्मीलगायत सरोकारवालाले सहयोग गरेका थिए। गाउँपालिकाले आगामी दिनमा पनि बजार अनुगमनलाई निरन्तरता दिने जनाएको छ।
