सिन्धुली । जिल्ला स्तरीय संयुक्त बजार अनुगमन समितिले म्याद गुज्रेका र अखाद्य वस्तु बिक्री वितरण गर्ने शुक्रबार सिन्धुलीमाढीका व्यवसायीलाई कारवाहि गरेको छ । फरक फरक व्यवसायीहरुबाट ५० हजार रुपैया जरिवाना गरिएको जिल्ला स्तरीय संयुक्त बजार अनुगमन समितिका संयोजक एवम् सहायक प्रमुख जिल्ला अधिकारी दिपेन्द्र पौडेलले बताए ।
अनुगमनका क्रममा कमलामाई नगरपालिका वडा नं. ६ स्थित अनिता जनरल स्टोर्समा म्याद नाघेका खाद्य पदार्थ बिक्रीका लागि राखिएको पाइएपछि उक्त पसललाई १५ हजार रुपैयाँ जरिवाना गरिएको छ । यस्तै कमलामाई नगरपालिका वडा नं. ६ कै सृष्टि एण्ड बिपिन किराना पसलमा भण्डारण कक्ष अव्यवस्थित, फोहोर रहेको तथा खाद्य पदार्थमा पूर्ण लेबल विवरण नभएको पाइएपछि २५ हजार रुपैयाँ जरिवाना गरिएको पौडेलले बताए ।
त्यसैगरी, दर्ता नगरी होटल सञ्चालन गरेको कसुरमा एक होटललाई १० हजार रुपैयाँ जरिवाना गरिएको अनुगमन टोलीले जनाएको छ । अनुगमनका क्रममा करिब ३ हजार रुपैयाँ बराबरका म्याद नाघेका खाद्य सामग्री जफत गरी नष्ट गरिएको छ । अनुगमन टोलीले सिन्धुलीमाढीका विभिन्न पसल तथा होटल–रेस्टुरेन्ट गरी जम्मा ८ वटा व्यवसायहरुको अनुगमन गरेको थियो ।
उपभोक्ता हित संरक्षण र बजार व्यवस्थापनलाई प्रभावकारी बनाउने उद्देश्यले गरिएको उक्त अनुगमनमा जिल्ला प्रशासन कार्यालय, कोष तथा लेखा नियन्त्रक कार्यालय सिन्धुली, खाद्य प्रविधि तथा गुण नियन्त्रण डिभिजन कार्यालय, उद्योग तथा वाणिज्य कार्यालय सिन्धुली, जिल्ला प्रहरी कार्यालयका प्रतिनिधि तथा पत्रकारहरुको सहभागिता रहेको उद्योग बाणिज्य कार्यालय सिन्धुलीले जनाएको छ ।
अनुगमन टोलीले एक ग्याँस बिक्रेताको समेत निरीक्षण गरेको थियो । उक्त बिक्रेतासँग ग्याँस सहज रूपमा उपलब्ध रहेको पाइएको र आपूर्ति व्यवस्थामा तत्काल कुनै समस्या नरहेको सहायक प्रमुख जिल्ला अधिकारी पौडेलले बताए ।
बजारमा ग्याँस अभावको गुनासो बढिरहेका बेला गरिएको यस अनुगमनले उपभोक्तामा केही राहत मिल्ने र व्यवसायीहरुलाई सचेत गराई कालो बजारी र कृतिम अभाव सृजना नगर्न चेतावनी समेत दिएको पौडेलले बताए । सहायक प्रमुख जिल्ला अधिकारी पौडेलले बजार अनुगमनलाई निरन्तरता दिइने बताएका छन् ।
