सिन्धुली । नेकपा एमालेका निवर्तमान केन्द्रीय तथा नेकपा एमालेका तर्फबाट क्षेत्र नं. २ का उमेदवार मनोजजंग थापाले पुराना राजनीतिक दलहरु २००७ सालदेखि नै परिवर्तनका लागि संघर्ष गरेका पार्टीहरु भएको बताउँदै राजनीति नै परिवर्तनका लागि गरिने बताएका छन् ।
बुधबार नेकपा एमाले वडा नं. ५ को निर्वाचन प्रचार प्रसार तथा सम्पर्क कार्यालयको उद्घाटन कार्यक्रममा सम्बोधन गर्दै उनले नयाँ र पुरानाको भाष्य लिएर सामाजिक सञ्जाल रंगाएर देशमा परिवर्तन सम्भव नहुने बताए । परिवर्तनका लागि लामो समयदेखि संघर्ष गरेका पार्टीहरुको योगदान देश र समाजको परिवर्तनमा उल्लेखनीय भएको समेत उनले बताएका छन् ।
‘नयाँ पुस्ताले भनेको जस्तो देशमा परिवर्तन चाहिन्छ, सुधार चाहिन्छ, सुशासन चाहिन्छ, विकास चाहिन्छ । त्यसका लागि हामी निरन्तर लागेका छौं’, थापाले भनेका छन् । लोकतन्त्र, गणतन्त्र स्थापना, संविधान निर्माणदेखि विकास निर्माणमा भएका कामहरु पुरानै दलले गरेको बताउँदै केहि भएन भन्ने भाष्यले परिवर्तन गर्न नसक्ने बताए ।
मिडियाले पछिल्लो राजनीतिक परिस्थितिलाई तिललाई पहाड बनाउने काम गरेको बताउँदै नेकपा एमालेले देशको भाग्य र भविष्य बनाउने कुरा सरल र सभ्य भाषामा जनतालाई बुझाउन थापाले कार्यकर्तालाई आग्रह गरेका छन् । परिणाम निकाल्ने गरि परिचालित हुन समेत उनले अनुरोध गरेका छन् ।
कार्यक्रममा बोल्दै नेकपा एमालेका निवर्तमान केन्द्रीय सदस्य उमा कोइरालाले मुलुकमा एमाले जत्तिको पार्टी अरु नभएको बताएकी छिन् । मुलुक बनाउने, संमृद्धिको लागि एमाले निरन्तर क्रियाशिल रहेको सत्य कसैसँग नलुेकोका बताईन् । उनले मुलुक र जनताको हितमा एमालेले निरन्तर काम गर्दै आएको र गर्ने समेत बनाएकी छिन् ।
यस्तै नेकपा एमालेका जिल्ला अध्यक्ष महेन्द्रदेव श्रेष्ठले एमालेले उन्नत किसिमको लोकतन्त्र, विधिको शासन, आर्थिक उन्नती र सुशासन र संविधानको रक्षा चाहेको बताएका छन् । उनले अहिलेको निर्वाचन देश जोगाउने र देश जलाउनेका बीचको प्रतिस्पर्धा भएको बताउँदै राष्ट्र, राष्ट्रियता, स्वाभिमान, मानवअधिकार र संमृद्धि एमालेको एजेण्डा भएको बताएका छन् । प्रचार प्रसार कार्यालयको उद्घाटन गर्दै नेकपा एमाले जिल्ला सल्लाहकार परिषदका संयोजक फाल्गुणी शर्मा तिमल्सिनाले निर्वाचनमा सबै एकतावद्ध भएर अगाडि बढ्न आवश्यक रहेको बताए ।
कार्यक्रममा नेकपा एमाले सिन्धुलीका सल्लाहकार कृष्णप्रसाद ढकालले निर्वाचनमा संयमतापूर्वक लाग्नुपर्नेमा जोड दिए । वडा स्तरीय वृहत वडा भेला समेत रहेको कार्यक्रमबाट वडा इन्चार्ज विमला काफ्लेको संयोजकत्वमा वडा स्तरीय निर्वाचन परिचालन कमिटी निर्माण गरिएको छ भने विषयगत कमिटीहरु समेत गठन गरिएको छ । प्रचारप्रारका लागि जिम्मेवारी तथा कार्यविभाजन समेत गरिएको छ । वडा कमिटीका उपाध्यक्ष विर बहादुर लामाको अध्यक्षतामा भएको कार्यक्रमको सञ्चालन सचिव जमुना श्रेष्ठले गरेकी थिईन ।
