सिन्धुली । कमलामाई नगरपालिका वडा नं. ९ भिमानबाट लागु औषध खैरो हिरोईन र लागु औषधका रुपमा प्रयोग हुने इन्जेक्सन सहित दुई जना पक्राउ परेका छन् । शनिबार भिमान चेकपोष्टमा नियमित चेकजाँचका क्रममा दुई जना पक्राउ परेका हुन् ।
चेकजाँचका क्रममा इभि हाईस गाडीमा सवार रहेका ९ सय पिस इन्जेक्सन सहित महोत्तरी मठियानी नगरपालिका वडा नं. ८ का दीप नारायण साह पक्राउ परेका छन । साहको साथमा रहेको कालो रङको झोलाभित्र कालो प्लास्टिकमा पहेँलो टेपले बेरिएका ३ वटा पोका फेला परेको थियो । उक्त पोकाभित्र लुकाई छिपाई ल्याइएको बुप्रेनोर्फिन इन्जेक्शन तीन सय पिस, डायजेपाम इन्जेक्शन तीन सय पिस र प्रोमेथाजिन इन्जेक्सन तीन सय पिस बरामद गरिएको जिल्ला प्रहरी कार्यालय सिन्धुलीका डिएसपी सूर्य प्रकाश सुवेदीले जानकारी दिए ।
इलाका प्रहरी कार्यालय भिमान र लागू औषध नियन्त्रण ब्युरो शाखा कार्यालय बर्दिबासको संयुक्त टोलीले जनकपुरबाट काठमाडौँतर्फ जाँदै गरेको इभि हाईस चेकजाँच गर्ने क्रममा उक्त लागू औषध फेला पारेको सुवेदीले बताए ।
यस्तै लागु औषध खैरो हिरोईन सहित एक जनालाई पनि शनिबार नै पक्राउ गरिएको छ । झापाबाट काठमाण्डौतर्फ जाँदै गरेको बा५ख५९१५ नम्बरको गाडीमा सवार काठमाण्डौ महानगरपालिका वडा नं. २६ गोगंबुका १९ वर्षीय डेविट थापा मगरलाई लागु औषध खैरो हिरोईन सहित पक्राउ गरेको हो ।
मगरको साथबाट हेपिडेण्टको डब्बाभित्र लुकाई लाँदै गरेको १७.४९० ग्राम खैरो हिरोईन बरामद गरिएको छ । चेक जाँच गर्ने क्रममा मगरले लगाएको कालो रङको कटराइज पाइन्टको दायाँ गोजीमा ह्यापीडेन्टको डब्बा भित्र २ वटा कालो प्लाष्टिकमा बेरी लुकाई छिपाई ल्याएको लागु औषध बरामद गरिएको हो ।
लागू औषध सहित पक्राउ परेका व्यक्तिलाई इलाका प्रहरी कार्यालय भिमानमा राखी आवश्यक अनुसन्धान अगाडि बढाईएको सुवेदीले जानकारी दिए ।
