सिन्धुली । के तपाईंले योमरी चाख्नु भयो ? के तपाईंलाई नेवारी खाजा सेट र नेवारी परिकारबारे जानकारी छ ? नेवारी खाजाको स्वाद थाहा पाउनुभएको छ ? छैन भने सिन्धुली महोत्सवमा आउनुहोस् जहाँ नेवारी खाजा सुपथ मुल्यमा स्वाद लिन पाउनुहुनेछ । सिन्धुली महोत्सवको पहिलो स्टलमा नेवारी खाजा घर रहेको छ जहाँ सस्तो मुल्यमा नेवारी खाना, खाजाको स्वाद लिन पाईन्छ ।
यो महोत्सवको मौलिक परिकारको आकर्षणको रुपमा रहेको छ । सिन्धुली महोत्सव २०८२ को सस्तो खाजा घरको रुपमा पनि यो खाजा घर चर्चित बनेको छ । महोत्सवमा आउनेहरुलाई परम्परागत नेवारी स्वाद, मौलिक संस्कृतिको अनुभव लिनका लागि आकर्षक स्थान बनेको छ नेवारी खाजा घर । जहाँ नेवारी खाजा सेट, योमरी लगाएतका परिकारहरु रहेका छन् । नेवारी पोशाकमा सजिएका नेवारी महिला पुरुषको हातबाटै यो परिकार लिन पाईने व्यवस्थाले नेवारी पोशाकको समेत प्रचार प्रसार गरिरहेको देखिन्छ । अन्य खाजाहरुको तुलनामा नेवारी खाजा सस्तो र सुलभ मुल्यमा समेत विक्री भईरहेको छ ।
नेवारी परिकारमा १ सेटमा ८ वटा परिकार रहेको हुन्छ । जसमा चिउरा, साँधेको कालो भटमास, माछा, अण्डा,पोलेको छोइला, साँधेको अचार, वादी, फ्राइ गरेको आलु, भुटन फ्राइ, यमरी र किमा फ्राइ जस्ता परिकारहरु छन् । एक सेट परिकार मात्र तीन सय रुपैँयामा विक्री भईरहेको छ । महोत्सव भित्र २०, २५ रुपैंया पर्ने एक बोतल पानीलाई नेवारी खाजा घरमा मात्र १५ रुपियाँमा किन्न सकिन्छ ।
महोत्सव हेर्न मात्र हैन त्यहाँ नेवारी खाजाको स्वाद लिनको लागि मानिसहरु महोत्सव छिर्ने गर्छन् । त्यहाँको नेवारी खाजाको स्वाद र मिठासमा सबै व्यक्तिहरु लोभिन्छन् । महोत्सवमा बजारका बनि बनाउ खाजाको साटोमा नेवारी खाजा चलेको छ ।
नेवार समुदायमा समेत लोप हुन लागेको नेवारी खाजा सेटलाई जगेर्ना गर्ने उद्देश्यले सिन्धुली महोत्सवमा नेवारी खाजालाई प्रदर्शनको साथ साथै बिक्री वितरणमा राखिएको नेवाः देय दवुले जनाएको छ ।
नेवाःदेय् दबु सिन्धुलीका अध्यक्ष राजकुमार श्रेष्ठका अनुसार नेवारी परम्परा र परिकारलाई प्रवद्र्धन गर्न नेवारी खाजालाई महोत्सवमा राखिएको हो ।
नेवाःदेय दवु र नेवाः मिसा दवुले विगत ६ वर्षदेखि आफ्नो परम्परा, रीतिरिवाज, सस्ंकार सस्कृतिलाई प्रवद्र्धन गनर्का लागि तत्पर रहेको छ । नेवारी परम्परालाई प्रवद्र्धन र प्रचार गर्ने उद्देश्यले नेवारी खाजा सञ्चालन गरिएको उनले बताए । खाजा घरमा काम गर्ने व्यक्तिहरुले नेवारी पोशाकमै सेवा समेत दिईरहेका छन् । नेवारी खाजा घरले दैनिक ३५ देखि ४० हजारसम्मको व्यवसाय गर्दै आएको श्रेष्ठले बताएका छन् ।
