सिन्धुली । जिल्ला प्रशासन कार्यालय सिन्धुलीले विपदको पूर्व तयारी थालेको छ । वर्षाको समयमा हुने सम्भावित विपदलाई व्यवस्थापन गर्नका लागि जिल्ला प्रशासन कार्यालयले विपदको पूर्व तयारी थालेको हो । गत असोजको बाढीका कारण भएको क्षति, तत्कालिन अवस्थामा उद्धार र प्रतिकार्यमा आएको समस्यालाई मध्यनजर गर्दै जिल्लामा विपद व्यवस्थापन गर्न सहज वातावरण बनाउन पूर्व तयारी सुरु गरको हो ।
जिल्लामा विपद र अन्य समयमा हुन सक्ने सञ्चारलाई व्यवस्थित गर्नका लागि विद्युत बाहेक अन्य वैकल्पिक पावर व्याकअपको व्यवस्था गर्न समेत नेपाल टेलिकमलाई निर्देशन गरेको छ । प्रमुख जिल्ला अधिकारी लिलाप्रसाद शर्माले पत्राचार गर्दै जिल्लामा रहेका टेलिफोन टावरको संख्या, बैकल्पिक पावर व्याकअपको भए नभएको विवरण र पावर व्याकअपको मर्मत भए नभएको विवरण माग गरेका छन । उनले वर्षातको समयमा प्रभावकारी सञ्चार सेवा उपलब्ध गराउन गरिएका कामको विवरण समेत माग गरेका छन ।
यस्तै उनले जिल्लाका सबै स्थानीय तहलाई पत्राचार गर्दै आगामी वर्षायाममा हुन सक्ने मनसुनजन्य विपदको अवस्थाबाट हुन सक्ने क्षतिबाट जोगाउन र तत्काल प्रतिकार्य प्रभावकारी बनाउन काम गर्न अनुरोध गरेको छ ।
प्रशासनले स्थानीय तहलाई मौसम पूर्वानुमानको सूचना वडा, टोलमा पु¥याउने व्यवस्था मिलाउन, जोखिमपूर्ण क्षेत्रमा मानिसहरुको बसोबास भए वा चौपाया, मुल्यवान सामग्रीहरु राखिएको भए, सार्वजनिक संचनाहरु भए तत्काल हटाई सुरक्षित स्थानमा सार्न र त्यस्ता स्थान, परिवार, व्यक्ति लगाएतको विवरण माग गरेको छ ।
मंगलबार जिल्लाका नै वटै स्थानीय तहलाई पत्राचार गर्दै प्रशासनले वर्षामा पालिका भित्रका सडकको जोखिमपूर्ण वा पहिरोजन्य स्थानहरुको पहिचान गरी सवारी साधन तथा मानिसको आवागमन रोक्न समेत अनुरोध गरेको छ ।
विपदको समयमा बाटो, सडक बन्द हुन सक्ने हुँदा जेसिवी लगाएतका सवारी साधन र अत्यावश्यकीय इन्धन र चालकको व्यवस्था गरिराख्न प्रशासनले आग्रह गरेको छ । विपद पश्चात अत्यावश्यकीय सेवाहरु खानेपानी, स्वास्थ्य उपचार, विद्युत, शिक्षा, इन्टरनेट सुविधाहरु अवरुद्ध हुन सक्ने हुँदा सो सुचारु गर्न तत्काल आवश्यक सम्बोध र समन्वय गर्ने व्यवस्था गर्न प्रजिअ शर्माद्धारा गरिएको पत्राचारमा उल्लेख गरिएको छ ।
यस्तै पालिका स्तरमा पालिकाका जनप्रतिनिधि, कर्मचारीहरु र सुरक्षा संयन्त्र सहितको ह्वाट्सएप ग्रुप निर्माण गरि सूचना प्रवाह गर्न समेत पत्रमा अनुरोध गरिएको छ ।
