सिन्धुली । लैंगिक हिंसा र यौन तथा प्रजनन स्वास्थ्य सम्बन्धि कचहरी नाटक शनिबार सिन्धुलीमाढीमा प्रदर्शन गरिएको छ । कलाघर सिन्धुलीको आयोजना तथा मेरीस्टोप्स इन्टरनेशनल, सुनौलो परिवार नेपाल र एकद्वार संकट व्यवस्थापन केन्द्र सिन्धुलीको सहयोगमा सिन्धुलीमाढीमा कचहरी प्रदर्शन गरिएको हो ।
टेम्पु पार्कमा गरिएको कचहरी प्रदर्शनमा लैंगिक,घरेलुु तथा यौन हिंसा, परिवार नियोजन सेवा, यौन तथा प्रजनन स्वास्थ्य तथा सुरक्षित गर्भपतन सम्बन्धि समस्या र ती समस्या व्यवस्थापनका विषयमा कलाकारहरुले कचहरी नाटक प्रदर्शन गरेका थिए । कलाकार मार्फत समस्या देखाई दर्शकबाट समाधानको लागि छलफल समेत गरिएको थियो ।
सुमन थापाको नाटक परिकल्पना तथा लेखनमा कलाघरका कलाकारहरु रिता थिङ, सिर्जना गोले, निरुता लामा, जीवन थापा मगर, रिता वि.क, रुबिना पुलामी, करुणा नेपाली, विकास पहेली, विशाल शंकर, कमल श्रेष्ठ, ममता श्रेष्ठ लगाएतका कलाकारहरुले नाटकमा अभिनय गरेका थिए ।
कलाघरले उक्त नाटक दुधौली नगरपालिका, गोलन्जोर गाउँपालिका, कमलामाई नगरपालिकाको सिन्धुलीमाढीमा कचहरी प्रदर्शन गरि सकेको छ । आइतबार मरिण र सोमबार घ्याङलेख गाउँपालिकामा प्रदर्शन गरिने सुमन थापाले बताएका छन ।
