सिन्धुली । प्रथम जिल्ला स्तरीय खेलकुद महोत्सव जारी छ । महोत्सवको अवसरमा शुक्रबार क्रिकेट र फुटबल प्रतियोगिता भएको छ । शुक्रबार भएको क्रिकेट खेलमा मरिण गाउँपालिकालाई १५५ रनको विशाल अन्तरले हराउँदै तीनपाटन गाउँपालिका फाइनलमा प्रवेश गरेको छ । पहिले ब्याटिङ गर्दै तीनपाटन गाउँपालिकाले २० ओभरमा ३ विकेट गुमाएर २४५ रन को विशाल टार्गेट सेट गरेको थियो ।
उक्त टार्गेट पूरा गर्ने क्रममा मरिण गाउँपालिकाले १७.४ बलमा १० विकेट गुमाउँदै ९० रन मात्र बनाएको थियो । प्रतियोगितामा मरिणलाई हराउँदै तिनपाटन गाउँपालिका फाइनलमा प्रवेश गरेको छ । फाइनलमा तीनपाटन गाउँपालिका र कमलामाई नगरपालिकाबीच प्रतिस्पर्धा हुने छ ।
यसैगरि दुधौली नगरपालिका र सुनकोशी गाउँपालिका बीच फुटबल खेल भएको छ । दुधौली नगरपालिका र सुनकोशी गाउँपालिका बीच भएको प्रतिस्पर्धामा ३–० गोल अन्तरले दुधौली नगरपालिकाले जीत हासिल गरेको छ । जीतसँगै दुधौली नगरपालिका सेमिफाइनलमा प्रवेश गरेको छ ।
आयोजक टिमका अनुसार शनिबार बिहान ७ बजेबाट खेलहरु सञ्चालन हुने छन् । ‘राष्ट्रका लागि खेलकुद तथा स्वास्थ्यको लागि खेलकुद‘ भन्ने नाराका साथ सुरु भएको खेलकुद महोत्सव ५ गते देखि १३ गतेसम्म सञ्चालन भईरहेको छ । सोमबारदेखि बुधबारसम्म राष्ट्रपति रनिङ शिल्ड अन्तर्गतका खेल सम्पन्न भएका छन भने खेलकुद महोत्सव अन्तर्गतका खेल विहिबारबाट सुरु भएका छन ।
जसमा फुटबल, क्रिकेट, ब्याडमिन्टन, म्याराथन र बक्सिङ लागायतका खेलहरु भईरहेका छन् । खेलकुद महोत्सवमा नौ वटै स्थानीय तहका खेलाडीहरु सहभागि भईरहेका छन ।
