सिन्धुली । नेपाली कांग्रेसकी केन्द्रीय सदस्य डा. डिला संग्रौलाले वर्तमान सरकारले ल्याएको नीति तथा कार्यक्रम कर्मकाण्डी, परम्परागत शैलीको रहेको बताईन । उनले सरकारको नेतृत्वले आफ्नै कार्यकर्तालाई पोस्ने खालको कार्यक्रम तय गरेको उनले आरोप लगाईन ।
प्रेस युनियन सिन्धुलीले शनिबार सिन्धुलीमाढीमा आयोजना गरेको पत्रकार सम्मेलनमा बोल्दै संग्रौलाले मुलुकको अर्थतन्त्र तरलताको अवस्थामा रहेको, व्यापार व्यवसायमा मन्दी छाएको, महंगीले चरम सिमा नाघेको, कालोबजारी बढेको भन्दै नीति तथा कार्यक्रमले त्यसलाई समेट्न नसकेको बताईन ।
संग्रौलाले रोजगारीका लागि युवाहरु विदेशतर्फ जाने क्रम बढ्दो रहेको बताउँदै रोजगारीसँग जोडिएका नीति तथा कार्यक्रम सरकारले ल्याउन नसकेको बताईन । यस्तै नीति तथा कार्यक्रमले महिलाहरुलाई समेट्न नसकेको, शिक्षा क्षेत्रलाई व्यवस्थित गर्न समेत कार्यक्रम नल्याएको उनले बताईन ।
संग्रौलाले राज्यको गृहमन्त्री रवी लामिछानेको सहकारी काण्ड छानविन हुनुपर्ने कांग्रेसको माग जायज रहेको बताईन । उनले गृहमन्त्री लामिछाने सहित देशभरका सहकारीमा भएको घोटालाको छानविन गर्न संसदीय समिति निर्माणको लागि कांग्रेसले माग गरेको बताएकी छिन ।
लोकतन्त्रको सुन्दर पक्ष विचार राख्न पाउनुपर्ने भएको बताउँदै उनले रवी लामिछानेलाई बोल्न दिनुपर्ने तर रवीले बोलिसकेपछि प्रमुख प्रतिपक्षी दल कांग्रेसले मागको बारेमा बोल्न पाउनुपर्ने दावी गरिन । सभामुखले संसदीय मर्यादा ख्याल नगरि प्रतिपक्ष उभिरहँदा संसद चालु गरेर ब्लु डोजर प्रवृति देखाएको समेत उनले आरोप समेत लगाईन ।
अवैधानिक बाटोबाट सरकार परिवर्तन हुने प्रवृतिको विकास भएको बताउँदै उनले अदालतले नै संविधानको अपव्याख्या गरेको बताईन । उनले गण्डकी र कोशी प्रदेशमा भएको सरकार परिवर्तन र अदालतको आदेश संविधानसम्मत नभएको जिकिर गरिन । त्यस्तै प्रदेशसभामा सभामुखलाई तटस्थ रहन नदिएको पनि उनले बताईन । सरकार निर्माण र सञ्चालनमा आएको अस्थिरताले संघियता नै धरापमा परेको भन्दै उनले चिन्ता समेत व्यक्त गरिन ।
