सिन्धुली । कमलामाई नगरपालिका वडा नं. ४ ढुंग्रेवासमा रहेको कमला सप्लायर्सलाई २ लाख पचास हजार जरिवाना गर्ने निर्णय गरिएको छ । जिल्ला स्तरीय संयुक्त अनुगमन समितिले केहि दिन अघि गरेको अनुगमनमा म्याद सकिएको चिउरा नयाँ बोरामा रिप्याकेजिङ गर्दै गरेको फेला पारेपछि सप्लायर्सलाई जरिवाना गर्ने निर्णय गरेको हो ।
जिल्ला प्रशासन कार्यालयका अधिकृत प्रवीण कटुवालको अध्यक्षतामा शुक्रबार बसेको संयुक्त अनुगमन समितिको बैठकले कमला सप्लायर्सलाई जरिवाना गर्ने निर्णय गरेको हो ।
अनुगमन टोलीले सप्लायर्सबाट २५ केजीको ४८ बोरा चिउरा र २५ केजीको ६ बोरा चामल बरामद गरेको थियो । बरामद गरेको चिउरामध्ये १८ बोरा चिउरा मुसाले खाएको र ३० बोरा चिउराको बोरा फेरेको अवस्थामा अनुगमन टोलीले बरामद गरेको थियो ।
यस्तै अनुगमन समितिले उक्त सप्लायर्सबाट २५० एमएलको १८ सय बोत्तल म्याद सकिएको पेय पदार्थ क्यासकोला समेत बरामद गरेको थियो । जफत गरिएको सामान समितिले सोमबार नै नष्ट गरेको थियो ।
समितिले सप्लायर्सबाट १ लाख ६७ हजार ८ सय ५० रुपैयाँ बराबरको म्याद गुज्रेका सामग्री जफत गरी नष्ट गरेको समेत जनाएको छ ।
उद्योग तथा वाणिज्य कार्यालय सिन्धुलीका प्रमुख ध्रुव ढकालका अनुसार समितिले जिल्लालाई खाद्य सुरक्षा दिलाउन जिल्लाभर अनुगमन गरिरहेको छ । बैशाख महिनामा मात्र ४ पटक अनुगमन गरेको ढकालले बताएका छन ।
अनुगमनका क्रममा रानी इन्टरप्राईजेज रातामाटाबाट ४० बोरा म्याद सकिएको चिउरा बरामद गरिएको पनि ढकालले बताए । यस्तै एक महिना अघिकै मिति राखेर भुजा बजारमा पठाउने विवेक भुजा मिल कनपा ६ लाई २० हजार रुपैंया जरिवाना गरेको छ । उक्त मिलले तीनपाटनको चकमके बजारमा एक महिना अघिको मिति राखेर भुजा पढाएको पाईएको ढकालले जानकारी दिए ।
अनुगमनका क्रममा म्याद गुज्रिएका सामग्री बरामद गर्ने, नष्ट गर्ने र आवश्यकता अनुसार कारवाहि गर्ने समेत गरिहेको उनले बताए ।
समितिले सदरमुकाम सिन्धुलीमाढीमा बैशाख महिनामा मात्र तीन पटक अनुगमन गरेको जनाएको छ । यस्तै तीनपाटन गाउँपालिकाको चकमकेमा एक पटक अनुगमन गरेको छ । अनुगमनका क्रममा म्याद गुज्रेका सामग्रीहरु विक्री वितरण भईरहको पाईएको उनले बताएका छन ।
