सिन्धुली । नेकपा एमालेको आठौं अधिवेशन बुधबारबाट सिन्धुलीमाढीमा हुने भएको छ । बुधबार र विहिबार सिन्धुलीमाढीमा अधिवेशन गरिने नेकपा एमालेका प्रचार विभाग प्रमुख सञ्जय दाहालले बताए । प्रचार प्रसार उपसमितिले मंगलबार सिन्धुलीमाढीमा पत्रकार सम्मेलन गरेर अधिवेशनको तयारी पुरा भएको जानकारी दिएको हो ।
बुधबारदेखि सुरु हुने अधिवेशनमा ७ सय ८४ जना प्रतिनिधि तथा आयोजकले सहभागिता जनाउने पत्रकार सम्मेलनमा जानकारी दिइएको छ । अधिवेशनको उद्घाटन नेकपा एमालेका महासचिव शंकर पोखरेलले गर्नेछन । अधिवेशनका लागि जिल्लाका ९ वटा स्थानीय तहबाट ५ सय १४ जना प्रतिनिधि छनौट भई सकेका छन । जनसंगठनबाट ७६ जना, आयोजक १ सय ३० जना, सल्लाहकार २५ जना र मनोनित ३९ जना प्रतिनिधि छनौट भईसकेका छन ।
अधिवेशनले एक अध्यक्ष, एक उपाध्यक्ष, एक सचिव र दुई उपसचिव सहित १ सय ५ जनाको कमिटि निर्वाचित गर्ने छ । अधिवेशनबाट ३३ प्रतिशत महिला, १५ प्रतिशत युवा निर्वाचित हुनेछन् । नेकपा एमालेले प्रतिनिधि छनौटमा नै ३३ प्रतिशत महिला र १५ प्रतिशत युवालाई छनौट गरिसकेको छ ।
नौ वटा स्थानीय तहको भुगोलतर्फ ७३ जना सदस्य निर्वाचित हुने छन । जसमा २४ जना महिला, एक महिला सहित ११ जना युवा निर्वाचित हुने छन । विशेष समावेशी कोटामा १० जना, खुल्लामा १२ जना निर्वाचित हुनेछन ।
नेकपा एमालेले एक महिला पदाधिकारी अनिवार्य गरेको छ । नेकपा एमालेका जिल्ला अध्यक्ष रामकुमार कार्कीले पत्रकार सम्मेलनमा बोल्दै जिल्ला अधिवेशनले एकताको सन्देश दिने बताएका छन ।
यस्तै जिल्ला इन्चार्ज खेम लोहनीले पत्रकार सम्मेलनमा बोल्दै एमालेको जिल्ला नेतृत्व सर्वसम्मत गर्न सफल हुने प्रयाप्त आधार तयार भएको बताए । उनले सर्वसम्मत नेतृत्व चयनका लागि छलफल जारी रहेको बताए । सर्वसम्मत नेतृत्व चयन हुन नसके निर्वाचन प्रक्रियाबाट अधिवेशन सम्पन्न गरिने गरि तयारी पुरा भएको पनि उनले जानकारी दिए ।
