मंसिर ४ गते हुने प्रतिनिधिसभा तथा प्रदेशसभाको निर्वाचनका लागि नेकपा एमाले सिन्धुलीको आइतबार बसेको बैठकले प्रत्यक्षतर्फ २ महिला सहित २४ जनाको नाम सिफारिस गरेको छ भने समानुपातिकतर्फ १८ जना महिला सहित ३७ जनाको नाम सिफारिस गर्ने निर्णय गरेको छ ।
सिन्धुली । नेकपा एमाले सिन्धुलीले आगामी मंसिर ४ गते हुने प्रदेश सभा तथा प्रतिनिधिसभाका उमेदवारको नाम सिफारिस गरेको छ । जिल्ला कमिटी सिन्धुलीको आइतबार सिन्धुलीमाढीमा बसेको बैठकले मातहत कमिटीबाट आएको नामलाई स्वीकृत गर्दै उमेदवार सिफारिस गरेको हो ।
बाग्मति प्रदेश कमिटीमा प्रत्यक्ष र समानुपातिकतर्फका उमेदवार सिफारिस गरेको हो ।
एमालेले सिन्धुलीबाट प्रत्यक्षतर्फ दुई संघिय निर्वाचन क्षेत्रमा ६ जना र ४ प्रदेश निर्वाचन क्षेत्रका लागि १८ जनाको नाम सिफारिस गरेको छ । प्रदेश निर्वाचन क्षेत्र समन्वय कमिटी र प्रतिनिधिसभा निर्वाचन क्षेत्र समन्वय कमिटीको बैठकबाट सिफारिस भई आएका नामलाई जिल्ला कमिटीको आइतबार बसेको बैठकले जस्ताको तस्तै अनुमोदन गरि सिफारिस गरेको हो ।
बैठकले प्रतिनिधिसभाको प्रत्यक्षतर्फ निर्वाचन क्षेत्र नं. १ बाट ४ जनाको नाम सिफारिस गरेको छ । प्रदीप कटुवाल, सुवास देवकोटा, केदार प्रसाद देवकोटा र गंगा कार्कीको नाम सिफारिस गर्ने निर्णय गरेको छ भने निर्वाचन क्षेत्र नं. २ बाट मनोजजंग थापा र कौशल कोइरालाको नाम सिफारिस गरेको छ ।
यस्तै प्रदेशसभातर्फ क्षेत्र नं. १ (क) बाट घनश्याम राउत, डम्बर कार्की, लाल बहादुर बुढाथोकी, हेम लामा र हरिहर थापाको नाम सिफारिस भएको छ । क्षेत्र नं. १ (ख) बाट कुमार बहादुर कार्कीको एकल नाम सिफारिस भएको छ ।
यस्तै प्रदेशसभातर्फ क्षेत्र नं. १ (क) बाट विनोद कुमार खड्का, केशव प्रसाद देवकोटा, गंगा कार्की, देवराज वाईवा, रामकृष्ण श्रेष्ठ, रमेश कार्की र खड्ग बहादुर खत्रीको नाम सिफारिस भएको छ । क्षेत्र नं. २ (ख) बाट रामकुमार पौडेल, रामकुमार उप्रेती, गणेश बुढाथोकी, उद्दव गुर्जेलि राई र पुष्प बहादुर श्रेष्ठको नाम सिफारिस भएको छ ।
समानुपातिक तर्फका उमेदवारको नाम पनि बैठकले सिफारिस गरेको छ । समानुपातिक तर्फ प्रतिनिधिसभाका लागि ८ जनाको नाम सिफारिस भएको छ ।
खसआर्यतर्फ उमादेवी कोइराला, मिनादेवी कार्की, जनजातीतर्फ निरु कुमारी दर्लामी, रणकुमारी बलम्पाकी मगर, अर्जुन प्रधान, जनजाती सिमान्तकृततर्फ विषमलाल अधिकारी दनुवार, जनजाती अल्पसंख्यकतर्फ सिरीलाल माझी र दलित तर्फ भिम बहादुर वि.कको नाम सिफारिस भएको छ ।
नेकपा एमालेका जिल्ला अध्यक्ष रामकुमार कार्कीको अध्यक्षतामा सम्पन्न बैठकले प्रदेशतर्फ समानुपातिकमा २९ जनाको नाम सिफारिस गरेको छ ।
सिफारिस हुनेमा खसआर्यतर्फ भोजराज ढुंगेल, कमलप्रसाद दाहाल सिफारिस भएका छन । त्यस्तै खसआर्य महिलातर्फ पार्वती भट्टराई, कमला पोखरेल, अप्सरा खड्का, शान्ता राउत, गौरा देवकोटा, डण्डकेशरी सापकोटा, रमा शर्मा, रश्मिला देवकोटा, मिथुला कुमारी घिमिरे, सारदा देवकोटा सिफारिस भएका छन । जनजाती महिलातर्फ निलिमा गुरुङ, पदममाया तामाङ र सुकुमाया तामाङ सिफारिस भएका छन ।
यस्तै जनजाती सिमान्तकृतमा कमलजंग राई, नारायण अधिकारी, धनबहादुर माझी सिफारिस भएका छन भने जनजाती लोपोन्मुखमा लक्ष्मण हायु सिफारिस भएका छन ।
समानुपातिकमा जनजातीतर्फ ज्ञानध्वज लामा, टुक्त बहादुर पुलामी, नवराज थिङ, खड्ग बहादुर सुनुवार र खड्ग रजन मगर सिफारिस भएका छन । यस्तै दलिततर्फ शंकर बहादुर सार्की, निर्मल कुमार रम्तेल र राम बहादुर वि.क सिफारिस भएका छन । त्यसैगरि अपांगता तर्फ मोहनकुमारी फुयाँल (मिथिला) र धनजंग थापा सिफारिस भएका छन ।
प्रत्यक्षमा महिलाको संख्या न्युन
जिल्लाबाट प्रतिनिधिसभा तथा प्रदेशसभाको प्रत्यक्ष निर्वाचनमा महिलाको उमेदवारी दिने महिला कम देखिएका छन । प्रतिनिधिसभातर्फ एक जना र प्रदेशसभातर्फ एकजना गरि दुईजना महिलाको मात्र आकांक्षा देखिएको छ ।
महिलाहरुको आकर्षण समानुपातिकमा बढी देखिएको छ । समानुपातिकतर्फ १८ जना महिलाको दावी रहेको छ । प्रतिनिधिसभातर्फ ४ जना र प्रदेशसभातर्फ १४ जना महिलाको आकांक्षा देखिएको छ । यसरी आकांक्षा गर्नेमा दलित महिलाको संख्या भने शुन्य देखिएको छ ।
