सिन्धुली । काठमाडौं महानगरपालिका वडा नम्बर २६ सामाखुशी बस्ने युटुबर चेतन कार्की लागुऔषध सहित सिन्धुलीबाट पक्राउ परेका छन । जिल्लाको गोलञ्जोर गाउँपालिका ७ खुर्कोटस्थित वीपी राजमार्ग सडक खण्डबाट कार्की पक्राउ परेका हुन ।
कार्कीले प्रयोग गर्दै आएको ‘चेतन व्लग’ आवरणको मिनी ट्रकलाई रोकी चेकजाँच तथा खानतलासी गर्दा ४.१३० ग्राम खैरो हिरोइन तथा ६.९४० ग्राम गाँजा फेला पारेपछि कार्कीलाई प्रहरीले पक्राउ गरेको हो ।
कार्कीले लगाएको खैरो रंगको ट्रयाकको दाहिने खल्तीबाट खैरो हेरोइन र उनले चलाएको गाडीमा राखिएको गोल्डेन रंगको गितारको कभरबाट गाँजा बरामद भएको जिल्ला प्रहरी सिन्धुलीका डिएसपी मनोज कुमार लामाले बताए ।
उनले प्रयोग गर्दै आएको मिनी ट्रक शंकास्पद थियो । काठमाडौं महानगरपालिका वडा नम्बर २६ सामाखुशी बस्ने ३७ वर्षीय चेतनले चलाएको बागमती प्रदेश ०१–००३–क ९१८२ नम्बरको मिनी ट्रकलाई प्रहरी रोकेर चेकजाँच गरेको थियो । हेर्दै अचम्म खालको गाडी देखिएपछि प्रहरीले खानतलासी गरेको लामाले बताए ।
गाडीभित्रै बेडरुम, किचेन, बाथरुम र स्टुडियोको रुपमा प्रयोग गर्दै आएको पाइएको छ । गाडीलाई मोडीफाइ गरी उनले गाडी भित्रै गीत रेकर्ड गर्न सकिने प्रविधि जडान गरेको समेत पाईएको प्रहरीले जनाएको छ । बर्दिबासबाट धुलिखेलतर्फ जाँदै गर्दा प्रहरीले मिनीट्रक चेकजाँच गरेको थियो । नियमित चेकजाँचका क्रममा उनलाई बुधबार पक्राउ गरिएको छ ।
पक्राउ परेका कार्कीलाई जिल्ला अदालत सिन्धुलीबाट विहिबार ७ दिनको म्याद थप गरी अनुसन्धान भइरहेको लामाले बताए । पक्राउ परेका कार्कीले चेतन भ्लग्स नामक युटुव च्यानल चलाउँदै आएका छन ।
