सिन्धुली /जिल्ला प्रशासन कार्यालय सिन्धुलीमा कार्यरत कर्मचारीमा कोरोना संक्रमण देखिएपछि अत्यावश्यक बाहेकका सम्पूर्ण काम कारवाही बन्द गरिएको छ । जिल्ला प्रशासन कार्यालयले सोमबार एक सूचना प्रकाशित गरी कार्यालयबाट प्रदान गर्ने शान्ति शुरक्षा र मुद्दासँग सम्बन्धित बाहेकका अन्य सेवाहरु बन्द भएको जानकारी दिएको हो ।
अर्को सूचना जारी नभएसम्मका लागि आपतकालिन बाहेकका सबै सेवा बन्द गरिएको सहायक प्रमुख जिल्ला अधिकारी ऋद्धिप्रकाश सिटौलाले जानकारी दिएका छन । सहायक प्रमुख जिल्ला अधिकारी ऋद्वि प्रकाश सिटौलाद्वारा जारी सूचनामा कार्यालयका बिभिन्न शाखाका कर्मचारीहरुमा कोभिड १९ को संक्रमण पुष्टि भएको र अन्य कर्मचारीहरुमा समेत कोभिडसँग मिल्दोजुल्दो लक्षण देखा परेकोले सेवा प्रबाह गर्न कठिन भएको उल्लेख गरिएको छ ।
जारी सूचनामा ‘सेवा लिन आउने सेवाग्रही एवं कर्मचारीहरुमा समेत संक्रमण हुन सक्ने जोखिम देखिएकोले कार्यालयबाट प्रदान गर्ने शान्ति शुरक्षा र मुद्वा सम्बन्धी बाहेकका अन्य सेवाहरु अर्को सूचना नभएसम्म का लागि स्थगित गरिएको सवैमा अनुरोध छ,’ भनिएको छ ।
परिस्थिति सहज हुनासाथ क्रमश कार्यालयको सेवा सुचारु गरिने र अत्यावश्यक परेमा विषयगत व्यक्तिसँग सम्पर्क गर्न समेत सूचनामा आग्रह गरिएको छ । नागरिकता सम्वन्धमा रविन्द्र गौतम मोवाईल नम्वर ९८४०१७७३२७, राहादानी सम्वन्धमा भावना कार्की मोवाईल नम्वर ९८६०८८३५४८, राष्ट्रिय परिचयपत्र सम्वन्धमा मिथिला बिष्ट मोवाईल नम्वर ९८४३५५३६२७ र अन्य सवै सेवाको सम्बन्धमा नहकुल ढकाल मोवाईल नम्वर ९८४४०४३८६६ मा सम्र्पक गर्न पनि प्रशाशसनले अनुरोध गरेको छ ।
