सिन्धुली । कमलामाई नगरपालिका वडा नं. ६ रातामाटा घुम्तिमा रहेको शाह आयरन एण्ड इलेक्ट्रिक सेन्टर र कनिष्का कोल्ड स्टोरमा मंगलबार आगलागी हुदा १० करोड चालिस लाख बराबरको क्षति भएको छ । शाह आयरन एण्ड इलेक्ट्रिक सेन्टरमा विहान भएको आगलागीबाट उक्त क्षति भएको जिल्ला प्रहरी कार्यालय सिन्धुलीले जनाएको छ ।
आगो कति बजे लागेको हो भन्ने जानकारी नभए पनि आगोको मुस्लो निस्केपछि स्थानीयले साढे नौ बजे आगलागी भएको थाहा पाएका थिए । शाह आयरन एण्ड इलेक्ट्रिक सेन्टरको गोदामबाट विद्युत वाइरिङ सर्ट भएर आगलागी भएको जिल्ला प्रहरी कार्यालय सिन्धुलीका डिएसपी मनोज कुमार लामाले बताएका छन ।
उनका अनुसार पौने चार घण्टाको प्रयासपछि आगो नियन्त्रणमा आएको छ । आगलागीबाट शाह आयरन एण्ड इलेक्ट्रिक सेन्टरको ६ करोड ६५ लाखको क्षति भएको छ भने कनिष्का कोल्ड स्टोरको गोदाममा समेत आगो लाग्दा ३ करोड ७५ लाखको क्षति भएको प्रहरीले प्रारम्भिक अनुमान गरेको छ ।
दुवै पसलको गोदाममा आगो लागे पनि पसलमा भएका सामान भने जोगाइएको छ । तीन वटा वारुण यन्त्रको सहायतामा नेपाल प्रहरी, नेपाली सेना, शसस्त्र प्रहरी, कमलामाई नगरपालिकाको नगर प्रहरी, स्थानीयले आगो नियन्त्रणमा लिएका हुन । पसल तथा गोदामका सामानहरु जोगाउने प्रयास केहि सफल भएको पनि डिएसपी लामाले बताए । आगो निभाउनका लागि रामेछाप नगरपालिका, दुधौली नगरपालिका र कमलामाई नगरपालिकाको वारुणयन्त्र, उपलब्ध जेसिवी, ट्यांकरहरु समेतको प्रयोग गरिएको थियो ।
उनका अनुसार आगो निभाउने क्रममा एक जना धुवाँले निसास्सिएर घाईते भएका छन । कमलामाई नगरपालिका वडा नं. ५ का २८ वर्षिय विकास परियार घाईते भएका हुन । उनको सिन्धुली अस्पतालमा उपचारपछि घर फर्केका छन ।
लामाका अनुसार हर्डवेयरको गोदाममा प्रज्वलनशील सामान तथा पाइप, प्लाष्टिक, प्लाइउड लगायत आगोले चाँडै टिप्ने सामान भएकाले आगलागी पूरै नियन्त्रण लिन समय लागेको हो ।
यस्तै कनिस्काको गोदाममा रहेका हार्ड तथा सफ्ट मदिरा, चाउचाउ, विस्कुट, पेय पदार्थ लगायतका सामानहरु जलेका छन । विपी राजमार्गमा जोडिएको पसल भएकाले सवारी आवागमनमा समेत समस्या आएको थियो । राजमार्गमा सवारी जाम हुन थालेपछि प्रहरीले रुट परिवर्तन गराएर आवागमनलाई सहज बनाइएको थियो ।
