सिन्धुलीको कमलामाई नगरपालिका ६ रातमाटामा रहेको एक हार्डवेयर पसलमा आगलागी भएको छ । आगलागीका कारण पसल र गोदाम रहेका ५ वटा भवनमा क्षति भएको छ भने त्यहाँ रहेका सबै सामान जलेर नष्ट भएको छ । विहहान साढे ९ बजेदेखि भएको आगलागी पाँच घण्टासम्म नियन्त्रण भई नसकेको जिल्ला प्रहरी कार्यालय सिन्धुलीले जनाएको छ ।
कमलामाई नगरपालिकाको दमकल, नेपाल प्रहरी, नेपाली सेना, शसस्त्र प्रहरी र स्थानीयहरुले आगलागी भएदेखि नै आगो नियन्त्रणका लागि प्रयास गरिरहेका छन । आगो नियन्त्रण हुन लागेको जिल्ला प्रहरी कार्यालय सिन्धुलीका डिएसपी मनोज कुमार लामाले बताएका छन । उनका अनुसार आगो के कारणले लाग्यो खुल्न सकेको छैन ।
आगो नियन्त्रण गर्ने क्रममा एक जना घाईते भएको पनि लामाले बताएका छन । घाईतेको पुरा विवरण आई नसकेको तर उनको सिन्धुली अस्पतालमा उपचार भईरहेको लामाले जानकारी दिएका छन । घाइतेको अवस्था खतरामुक्त रहेको जानकारी प्राप्त भएको उनले जनाएका छन ।
आगलागीबाट पसलमा कति क्षति भयो ? सो को विवरण नखुलिसकेको पनि लामाले जानकारी दिए । तथापी आगलागीबाट करोडौंको क्षति भएको प्रहरीले अनुमान गरेको छ । पसल बन्द रहेकाले आगो कसरी लाग्यो भन्ने खुल्न सकेको छैन ।
