सिन्धुली । लैंगिक हिंसा नियन्त्रणमा स्थानीय सरकार जिम्मेवार बन्नुपर्नेमा एक कार्यक्रमका सहभागिले जोड दिएका छन । महिला मानवअधिकार रक्षक सञ्जाल सिन्धुलीले बुधबार सिन्धुलीमाढीमा आयोजना गरेको लैंगिक हिंसा विरुद्ध भएका प्रयास, उपलब्धि एवम् आगामी पहलहरु विषयक अन्तक्र्रिया कार्यक्रममा सहभागिहरुले यस्तो बताएका हुन ।
लैंगिक हिंसा न्युनिकरणका लागि स्थानीय तहहरुले उपलब्धिमूलक रणनीति, कार्ययोजना र बजेट तथा कार्यक्रम ल्याउन नसकेको महिलाका क्षेत्रमा क्रियाशिल व्यक्तिहरुले बताएका छन ।
कार्यक्रममा सहभागिहरुले स्थानीय सरकारहरु महिलाको जीवन जोगाउन जिम्मेवार नबनेको समेत बताएका छन । स्थानीय सरकारले निर्वाचन पछिका वर्षमा लैंगिक समावेशीका नाममा बजेट विनियोजन नगर्ने, थोरै बजेट विनियोजन गरे पनि त्यसको प्रभावकारी कार्यान्वयन नगर्ने, पीडितको पुनस्र्थापना तथा सुरक्षामा उचित लगानी नगरेको सरोकारवालाले कार्यक्रममा बताएका छन ।
कार्यक्रममा बोल्दै न्युनतम पारिश्रमिक निर्धारण समितिका सदस्य बिमला पाण्डेले लैंगिक हिंसा अन्त्यका लागि उचित नीति तथा कार्यक्रम बनाएर स्थानीय सरकारले काम गर्नुपर्नेमा जोड दिईन । उनले महिलाको अर्थपूर्ण सहभागिता, क्षमता अभिवृद्धि, हिंसा पीडितको न्यायमा सहजीकरण तथा पुनस्र्थापनामा काम गर्न स्थानीय सरकारहरु चुकेको बताईन । उनले सबै क्षेत्र र तहका अभियानकर्ताहरु महिलाका सामाजिक राजनीतिक तथा आर्थिक लगाएतका सवालमा एक ठाउँमा उभिएर वकालत गर्न समेत आग्रह गरिन ।
कार्यक्रममा बोल्दै मेलमिलाप समाज सिन्धुलीका अध्यक्ष पार्वती भट्टराईले मेलमिलाप केन्द्रहरुमा आउने मुद्दाहरु लैंगिक हिंसासँग सम्बन्धित आउने र ती महिलाहरु त्यहिँबाट फर्कने गरेको बताईन । उनले हिंसा पीडितले वडामा न्याय पाउने अवस्था नरहेको र न्यायको पहुँचमा पुग्न नसक्ने हुदा लैंगिक हिंसा घर घरमा रहेको बताईन ।
कार्यक्रममा बोल्दै जिल्ला प्रहरी कार्यालय महिला तथा बालबालिका सेवा केन्द्रका प्रमुख रामभक्त भट्टराईले जिल्लामा नयाँ आर्थिक वर्षको पाँच महिनामा यौन हिंसाका घटना बढेको बताए । उनले २४ वटा बलत्कार र १७ वटा बलत्कार प्रयासका घटनाको उजुरी जिल्ला प्रहरी कार्यालयमा दर्ता भएको बताए । उनले परिवार र आफन्तबाटै महिला र बालिका पीडित बनेको समेत बताए ।
कार्यक्रममा बोल्दै सेफ हाउस सिन्धुलीका सञ्चालक गिता देवकोटाले स्थानीय सरकारले पीडितलाई संरक्षण दिनका लागि जति सहयोग गर्नुपर्ने हो त्यति गर्न नसकेको बताईन । कार्यक्रममा एकद्धार संकट व्यवस्थापन केन्द्रका घटना व्यवस्थापक सुनिता शर्माले लैंगिक हिंसा नियन्त्रणमा भएका कामको सकारात्मक प्रचार र सहयोग पाउन नसकेको बताईन । उनले सबैलाई सहयोग गरिदिन आग्रह समेत गरि ।
कार्यक्रममा अनेमसंघका केन्द्रीय सचिवालय सदस्य रश्मिला देवकोटा, जिल्ला समन्वय समितिका सदस्य गंगा कार्की, विघटित भूमि व्यवस्था आयोग सिन्धुलीका सदस्य विष्णु पाण्डे, सहकार्य नेपालका उपाध्यक्ष सिरमला बम्जन लगाएतले छलफलमा सहभागिता जनाएका थिए ।
सञ्जालका अध्यक्ष अप्सरा खड्काको अध्यक्षतामा भएको कार्यक्रममा सञ्जालका सहसचिवले स्वागत मन्तव्य व्यक्त गरेकी थिइन भने कार्यक्रमको सहजीकरण सञ्जालका उपाध्यक्ष रमा कार्कीले गरेकी थिइन ।
