सिन्धुली । नेपाल कम्युनिष्ट पार्टीका संस्थापक महासचिव पुष्पलाल श्रेष्ठको ४३ औं स्मृति दिवसमा विहिबार एमाले निकट युवा संघ सिन्धुलीले वृक्षारोपण गरेको छ । कमलामाई नगरपालिकाको सिन्धुलीमाढीमा रहेको खुलामञ्चको छेउँमा युवा संघले वृक्षारोपण गरेको हो ।
नेकपा एमाले सिन्धुलीका अध्यक्ष एवम् वाग्मति प्रदेश सभा सदस्य प्रदीप कटुवाल, वाग्मति प्रदेश सदस्य विनोद खड्का, नेकपा एमाले जिल्ला सचिव शान्तीमान कार्की लगाएत जिल्ला स्तरका नेता, युवा नेता, महिला नेताहरु, पत्रकारहरुको उपस्थितिमा युवाहरुले वृक्षारोपण गरेका हुन ।
खुलामञ्चको ग्वाङखोला तर्फको क्षेत्रमा अशोक, अमला लगाएतका जातका विरुवाहरु वृक्षारोपण गरिएको छ । पुष्पलालले कम्युनिष्ट आन्दोलनबाट नागरिक अधिकारको सुरुवात गरेको सम्झना गर्दै वृक्षारोपण गरिएको युवा संघ सिन्धुलीका अध्यक्ष देवराज वाईवाले बताए ।
वृक्षारोपण कार्यक्रममा सम्बोधन गर्दै एमाले अध्यक्ष प्रदीप कटुवालले पुष्पलालले कम्युनिष्ट आन्दोलनलाई सुरुवात गरेको र आम कम्युनिष्टले उनको योगदानलाई सम्झनुपर्नेमा जोड दिए ।
एमाले यतिवेला भित्री तथा बाहिरी शक्तिबाट संकटमा परेको बताउँदै कम्युनिष्ट आन्दोलनलाई मजबुत बनाउन अनुरोध गरेका छन । उनले कम्युनिष्ट आन्दोलनलाई जोगाउँदै जनहितमा लाग्न सबै नेता कार्यकर्ताहरुलाई आग्रह समेत गरेका छन ।
यसैबीच नेकपा एमाले सिन्धुलीले पुष्पलालको स्मृतिमा माल्यार्पण गरेको छ । एमाले पार्टी कार्यालयमा पुष्पलालको तस्वीरमा माल्यार्पण गरि श्रद्धाञ्जली व्यक्त गरिएको एमाले सिन्ुधुलीका अध्यक्ष प्रदीप कटुवालले जानकारी दिएका छन ।
