सिन्धुली । नेकपा विभाजनको असर सहिदको स्मृति दिवसमा समेत परेको छ । नेपाली कम्युनिष्ट आन्दोलन तथा पञ्चायत विरुद्धको आन्दोलनका नायक ऋषिराज देवकोटा (आजाद) को स्मृति दिवसका अवसरमा विभाजित नेकपाका दुवै पक्षले औपचारिक रुपमा आजादको स्मृति दिवस मनाउने भएका हुन ।
बुधबार शहीद आजात नगरी कमलामाई नगरपालिका वडा नं. ९ भिमानमा छुट्टा छुट्टै सभाको आयोजना गरि नेकपा ओली पक्ष र प्रचण्ड माधव पक्ष नेकपाले आजादको स्मरण गर्ने भएका हुन ।
नेकपा ओली पक्षले नेकपा वाग्मति प्रदेशका अध्यक्ष आनन्द पोखरेलको प्रमुख आतिथ्यतामा आजाद स्मृति सभाहल भिमानमा स्मृति सभा गर्ने भएको छ भने प्रचण्ड माधव पक्षले भिमान बजारमा सभाको आयोजना गर्ने भएका छन ।
प्रचण्ड माधव पक्षधर नेकपाले नेकपा स्थायी कमिटी सदस्य घनश्याम भुसाल र हरिवोल गजुरेलको विशेष उपस्थितिमा कार्यक्रम गर्ने भएको उक्त पार्टी समर्थित नेताहरुले सामाजिक सञ्जाल मार्फत जनाएका छन ।
पञ्चायतका विरुद्धमा संघर्ष गरेका आजादको परिवार भने नेकपा ओली पक्षमा रहेका छन । आजादकी पत्नि गोमा देवकोटा, छोरा सुवास देवकोटा लगाएत देवकोटा परिवारले प्रधानमन्त्री एवम नेकपाका अध्यक्ष ओलीको नेतृत्वमा रहेको नेकपालाई समर्थन गरेका छन ।
