सिन्धुली । जिल्लामा चालु आर्थिक वर्षमा चक्लाबन्दी पकेट क्षेत्र बनाई खे ितगर्नका लागि बाली छनौट गरिएको छ । प्रधानमन्त्री कृषि आधुनिकीकरण परियोजना मार्फत कार्यान्वयन हुने गरि जिल्लाका पकेट क्षेत्रमा लगाउने बाली निर्धारण गरिएको हो । नीति तथा कार्यक्रम कार्यान्वयनका लागि बसेको समन्वय बैठक तथा जुनार सुपरजोन कार्यक्रमको समिक्षा कार्यक्रममा उक्त निर्णय गरिएको हो ।
यसरी पकेट क्षेत्रका लागि जिल्लामा धान, मकै, कोदो, तरकारी, सुन्तला जातका फलफूलहरु (जुनार, सुन्तला, कागती), भूई कटहर, केरा, किवी, अदुवा र बेसार छनौट गरिएको छ । नौ वटा स्थानीय तहमा त्यहाँको हावा पानी र माटो सुहाउँदो बाली निर्धारण गरिएको हो । जसमा अन्नबाली, तरकारीबाली र फलफूल खेति गरि विभाजन गरि छनौट गरिएको हो ।
प्रधानमन्त्री कृषि आधुनिकीकरण परियोजना अन्तर्गत जिल्लामा विगतका वर्षहरुमा जुनार सुपरजोन कार्यक्रम सञ्चालन भएकोमा यस वर्ष कृषिमा पकेट, व्लग, जोन र सुपरजोनका कार्यक्रमहरु सञ्चालन हुने भएका हुन । जसका लागि समन्वय बैठकबाट बालीको छनौट गरिएको परियोजना कार्यान्वयन ईकाईका वरिष्ठ कृषि अधिकृत देवराज अधिकारीले बताए ।
उनका अनुसार जिल्लामा ८ स्थानमा कृषिमा पकेट, व्लग, जोन र सुपरजोन सञ्चालनका लागि यो वर्ष ८० लाख बजेट विनियोजन गरिएको छ । जसमा सहकारी, नीजि क्षेत्रले यस्ता पकेट, व्लग, जोन सञ्चालनका लागि सहकार्य गर्न सक्ने छन ।
जिल्लामा परियोजना कार्यान्वयन ईकाइ मार्फत सञ्चालन हुने कार्यक्रमका लागि आर्थिक वर्ष २०७७÷०७८ मा कृषिका कार्यक्रम सञ्चालन गर्नका लागि ३ करोड ४३ लाख बजेट विनियोजन गरिएको छ ।
उक्त बजेट मध्ये ४ सय हेक्टर क्षेत्रफलमा जुनार बगैंचा व्यवस्थापन तथा किरा नियन्त्रणका लागि ४० लाख बजेट विनियोजन गरिएको छ ।
जुनारमा पैतिस प्रतिशत किरा नियन्त्रण
कार्यक्रममा परियोजनाको प्रगति विवरण प्रस्तुत गर्दै वरिष्ठ कृषि विकास अधिकृत देवराज अधिकारीले जुनारमा किरा नियन्त्रणमा ३५ प्रतिशत किरा नियन्त्रण गर्न गर्न सफल भएको बताएका छन । उनले २०७५ सालमा ५० प्रतिशत जुनारमा किरा लागेकोमा हाल त्यो प्रतिशत १५ मात्र रहेको बताए ।
२०७५ साल देखि प्रोटिन वेट छर्कन थालेको जुनार सुपरजोनलाई २०७७ सम्म आईपुग्दा किरा नियन्त्रणमा निकै सफलता मिलेको अधिकारीले बताए ।
आर्थिक वर्ष २०७३÷०७४ देखि हालसम्म जुनार सुपरजोनका लागि परियोजना मार्फत १२ करोड ४२ लाख रुपैंया खर्च गरिएको पनि उनले बताए । जुन जम्मा बजेटको ८० प्रतिशत खर्च हो । जिल्लामा हाल १ हजार ३ सय ४५ हेक्टर क्षेत्रफलमा जुनार खेति हुन्छ । जसमा २ हजार ४८ किसानले किसान परिचय पत्र समेत पाएका छन ।
उत्पादन र बजारको जिम्मा स्थानीय सरकारको
कार्यक्रममा बोल्दै बाग्मति प्रदेश सदस्य राजन दाहालले किसानलाई आशा र उत्साह जगाउने गरि स्थानीय सरकारले नीति तथा कार्यक्रम गर्नुपर्नेमा जोड दिए । उनले स्थानीय सरकारले उत्पादन र बजारीकरणको जिम्मा लिने गरि कृषिका दिर्घकालिन कार्यक्रम गर्न अनुरोध समेत गरे । 
दाहालले मल, विउ, प्रविधि, प्राविधिक र बजार व्यवस्थापनमा स्थानीय सरकारको नीति तथा कार्यक्रम केन्द्रीत गर्न आवश्यक रहेको बताए ।
उनले सबै स्थानीय तहले कृषि सामग्री केन्द्रको स्थापना गरि किसानलाई उत्पादनमा जोड्न आवश्यक रहेको तर्फ ध्यानाकर्षण गराए । कार्यक्रममा बोल्दै बाग्मति प्रदेश सभा सदस्य प्रदीप कटुवालले समन्वय र सहजताका साथ काम गर्न स्थानीय तहलाई आग्रह गरे ।
यस्तै सोहि कार्यक्रममा बोल्दै बाग्मति प्रदेश सभा सदस्य विनोद खड्काले रियल किसानकहाँ अनुदान पु¥याउन स्थानीय सरकारको अहम भूमिका हुने बताए । जिल्ला समन्वय समिति सिन्धुलीका संयोजक शंकरराज बर्मा तिवारीको अध्यक्षतामा भएको कार्यक्रममा बोल्दै गोलञ्जोर गाउँपालिकाका अध्यक्ष पुष्प बहादुर कार्कीले जुनार सुपरजोनले कार्यक्रम सञ्चालन गर्दा समन्वय नगरेको बताएका थिए ।
