सिन्धुलीमा कोरोना संक्रमण बढेको र समुदायमा समेत संक्रमण देखिएकाले जिल्लाका पाँच स्थानीय तहले सार्वजनिक सूचना जारी गरि लकडाउनको घोषणा गरेका छन । उनीहरुले अत्यावश्यक सेवा बाहेकका सबै सेवा बन्द रहेको जनाएका छन ।
जिल्लामा संक्रमितहरु भेटिने क्रम बढेपछि स्थानीय तहहरुले लकडाउन गर्न सुरु गरेका हुन । जिल्लाका कमलामाई नगरपालिका, गोलञ्जोर गाउँपालिका, मरिण गाउँपालिका, तिनपाटन गाउँपालिका र गोलञ्जोर गाउँपालिकाले लकडाउन गरेका हुन ।
जिल्लाको कमलामाई नगरपालिकाले मंगलबार रातीदेखि नै लकडाउन गरेको हो भने अन्य स्थानीय तहमध्ये सुनकोशी, गोलञ्जोरले विहिबारदेखि लकडाउन गरेका हुन ।
यस्तै शुक्रबारदेखि तिनपाटन गाउँपालिका सिन्धुलीले पनि आफ्नो गाउँपालिकामा लकडाउनको घोषणा गरेको छ । यस्तै मरिण गाउँपालिकाले पनि लकडाउनको घोषणा गरेको छ । सबै स्थानीय तहले आफ्ना नागरिकलाई सुरक्षित भई घरमै बस्न आग्रह समेत गरेका छन ।
स्थानीय तहहरुले लकडाउनको घोषणा गरे पनि जिल्लामा हुने कार्यक्रमहरु, तीजको दर खाने कार्यक्रमहरु भईरहेका छन । लकडाउनका बीचमा पनि लुकी चोरी सामान बेच्ने, रासायनिक मल लिन भिडभाड लाग्ने गरेका छन । यस्तै समूह समूहमा चोक चोकमा जम्मा हुने र गफगाफ गर्ने क्रम भने रोकिएको छैन ।
यसैबीच सिन्धुली अस्पतालले अस्पतालमा वेडको अभाव हुन थालेको र संक्रमितलाई राख्ने स्थान नभएको जनाएको छ । अस्पताल विकास समिति सिन्धुलीका अध्यक्ष प्रलाद कुमार पोखरेलले १४ दिन पूर्ण लकडाउन सहित होम क्वारेन्टाईनमा बस्न सबै जिल्ला बासीलाई सार्वजनिक आह्वान समेत गरेका छन । उनले समुदायमा कोरोना पुगिसकेकाले सुरक्षित हुनुको विकल्प नभएको बताएका छन ।
