सिन्धुली । आइतबार जिल्लामा चार जना नेपाली सेना सहित ६ जनामा कोरोना संक्रमण पुष्टि भएको छ ।
स्वास्थ्य कार्यालय सिन्धुलीका अनुसार पर्यावरण गणमा कार्यरत ३३, ३७, ३७ र ३८ वर्षका चार जना पुरुष, कमलामाई नगरपालिका वडा नं. ६ मा रहेको क्वारेन्टाईनमा रहेका तिनपाटन ४ का २२ वर्षिय पुरुष र एक जना सिन्धुली अस्पतालको ल्यावमा कार्यरत स्वास्थ्यकर्मीका अविभावकलाई कोरोना संक्रमण पुष्टि भएको हो ।
साउन २१ गते प्रादेशिक प्रयोगशाला हेटौडामा परिक्षणका लागि पठाईएका २२ वटा नमुना मध्ये ६ जनामा संक्रमण पुष्टि भएको स्वास्थ्य कार्यालयका प्रमुख जितेन्द्र कुमार शाहले बताएका छन । सिन्धुलीमा यति धेरै संक्रमण एकै पटक भेटिएको यो पहिलो पटक हो ।
आइतबार कोरोना संक्रमण पुष्टि भएकामध्ये नेपाली सेनाका ४ जना घर विदामा गई फर्केर क्वारेन्टाईनमा बसेका व्यक्ति हुन । अर्का एकजना महोत्तरीबाट सिन्धुली आई घरमै बसेका पुरुष रहेका छन ।
शनिबार सिन्धुलीका २ जनामा कोरोना संक्रमण पुष्टि भएको थियो । यो सँगै जिल्लाबाट पठाईएका नमुना मध्ये १९ जनामा संक्रमण पुष्टि भएको शाहले जानकारी दिएका छन । उनीहरुको स्वास्थ्य अवस्था सामान्य रहेको स्वास्थ्य कार्यालय सिन्धुलीले जनाएको छ ।
नेपाली सेनाका चार जनालाई नेपाली सेनाले तयार गरेको आईसोलेसनमा राखिएको छ । अन्य २ जना संक्रमितलाई सिन्धुली अस्पतालमा ल्याउने तयारी भईरहेको सिन्धुली अस्पतालका कोभिड १९ फोकल पर्सन डा. प्रसन्नजंग राजभण्डारीले बताएका छन ।
यसैबीच अस्पतालमा कार्यरत स्वास्थ्यकर्मीका अविभावकमा कोरोना भाईरस संक्रमण पुष्टि भएपछि सिन्धुली अस्पतालले आकस्मिक सेवा बाहेकका अन्य सेवा बन्द गरेको छ । सोमबारदेखि ३ दिनसम्मका लागि अस्पतालको आकस्मिक सेवा बाहेकका अन्य सेवा बन्द गरेको अस्पताल विकास समितिका अध्यक्ष प्रलाद पोखरेलले बताएका छन ।
