सिन्धुली । जिल्लाका दुधौली नगरपालिका र मरिण गाउँपालिका बाढी र पहिरोको उच्च जोखिममा रहेका छन । जिल्ला विपद व्यवस्थापन समितिले तयार गरेको विपद पूर्व तयारी तथा प्रतिकार्य योजना २०७७ अनुसार बाढी पहिरोको उच्च जोखिमा रहेका दुई स्थानीय तहमा उच्च सतर्कता अपनाउन आग्रह समेत गरिएको छ ।
लगातार वर्षा हुने र सतर्क रहन गृह मन्त्रालय अन्तर्गतको राष्ट्रिय विपद जोखिम न्युनिकरण तथा व्यवस्थापन प्राधिकरणले सतर्क गराएसँगै जिल्लाका जोखिम क्षेत्र सम्भावित स्थानीय तहले पनि पूर्व सतर्कता अपनाउन थालेका छन । विपद पूर्व तयारी तथा प्रतिकार्य योजना अनुरुप सतर्कता अपनाउन स्थानीय तहहरु सक्रिय बनेका छन ।
उनीहरुले सूचना सन्देश दिने तथा नागरिकलाई सचेतता पूर्वक जोखिम न्युन क्षेत्रमा रहन आग्रह समेत गरेका छन ।
प्रतिकार्य योजना अनुरुप बाढीका कारण कमलामाई नगरपालिका, हरिहरपुरगढी गाउँपालिका, र तिनपाटन गाउँपालिकालाई समेत जोखिमयुक्त क्षेत्रमा राखिएको छ । त्यस्तै पहिरोका कारण जिल्लाका दुधौली नगरपालिका, मरिण गाउँपालिका सहित अन्य सुनकोशी गाउँपालिका, फिक्कल गाउँपालिका, गोलञ्जोर गाउँपालिका, तिनपाटन गाउँपालिका, घ्याङलेख गाउँपालिका र हरिहरपुरगढी गाउँपालिकालाई पहिरोको उच्च जोखिममा राखिएको छ । यस्तै दुधौली नगरपालिका र कमलामाई नगरपालिका पनि पहिरोको जोखिमा रहेको उक्त योजनामा उल्लेख गरिएको छ ।
लगातार ४ दिनसम्म हुने भनिएको वर्षाका कारण जिल्लाका नदिनालाहरुमा बहाव बढ्न थालेको छ । प्रतिकार्य, उद्धार तथा व्यवस्थापनका लागि यस अघि नै विपद व्यवस्थापन समितिले पूर्व तयारी बैठक मार्फत तयारी गर्ने काम सुरु गरेको छ । तथापी बाढी आउन थालेपछि नागरिकमा केहि त्रास समेत बढेको छ । मरिण, कमला, बाग्मति, चँदाहा, सुनकोशी तावा नदि लगाएतका किनार नजिकका बस्तीहरुमा बाढीको त्रास भएको छ भने पहाडी भिरालो भूभागमा बसोबास गर्नेहरुमा पहिरोको त्रास बढेको छ ।
मरिण कमलामाई नगरपालिका, दुधौली नगरपालिका लगाएतका स्थानीय तहले नागरिकहरुलाई सुरक्षित भएर बस्न आग्रह समेत गरेका छन । सतर्कता अपनाउन र जोखिम क्षेत्रमा नजान नबस्न नागरिकहरुलाई सार्वजनिक रुपमा अपिल गरेका छन । स्थानीय प्रशासनले विपद प्रतिकार्य योजना अनुसार जोखिम क्षेत्र मानिएका स्थानमा नबस्न र नजान नागरिकहरुलाई अपिल गरेको छ ।
जिल्लाका सबै निकायहरुलाई विपदमा निभाउने भूमिका प्रतिकार्य योजना अनुरुप गर्न जिल्ला प्रशासन कार्यालय सिन्धुलीले जनाएको छ ।
कमलामाई र मरिणद्वारा सचेत रहन आग्रह
निरन्तर वर्षाको सुरुवात भएसँगै मरिण गाउँपालिका र कमलामाई नगरपालिकाले सतर्क रहन र सुरक्षित स्थानमा बस्न आफ्ना नागरिकहरुलाई आग्रह गरेका छन । कमलामाई नगरपालिकाले विहिबार विपद व्यवस्थापन समितिको बैठक बसी सूचना प्रणालीलाई व्यवस्थित गरि वडाहरुलाई जानकारी गराउने, विपद प्रतिकार्यका लागी नेपाली सेना, नेपाल प्रहरी, सशस्त्र प्रहरी, र रेडक्रस सोसाईटिलाई आफूसगँ रहेको प्रतिकार्य प्रविधिहरु चुस्त, दुरुस्त राख्न अनुरोध गर्ने नदि वहाव क्षेत्र, पहिरो सम्भावित क्षेत्र तथा डुवान र चट्याङ जस्ता सम्भावना क्षेत्रमा हुने आवत जावतलाई व्यवस्थापन गर्न वडा समिति, रेडक्रस, नागरिक समूहलाई अनुरोध गर्ने, सडक खण्डहरुमा सडक हेरालुलाई निरन्तर निगरानीका लागि निर्देशन गर्ने निर्णय गरेको छ । साथै विपदलाई मध्येनजर गरि ५० थान ठूलो साईजको त्रिपाल खरिद गरि स्टक राख्ने निर्णय गरेको छ ।
यस्तै मरिण गाउँपालिकाले सार्वजनिक सूचना जारी गरि पानी परिरहेको बेला नदि, खोला तथा पहिरोको सम्भावित स्थानमा नजान, वस्तुभाउ चराउन घाँसपात जाँदा सतर्क रहन, आफु बसेको ठाउँको पहिचान गर्ने, विगतमा भेल बाढी, पहिरो डुवान भए नभएको जानकारी राख्न आग्रह गरेको छ ।
गाउँपालिकाका प्रमुख प्रशासकीय अधिकृत विनोद पोखरेलले सूचना जारी गर्दै पूर्व सूचना प्रणाली र चेतावनीबारे जानकारी लिन, जोखिम क्षेत्रका बासिन्दा केहि दिन, हप्ता र महिनाका लागि बसाई सर्न समेत अनुरोध गरेका छन । मरिण गाउँपालिका पहिरो र बाढीको उच्च जोखिममा रहेको छ ।
