सिन्धुली । कमलामाई नगरपालिका ८ बागमाराकी ६० वर्षिय महिलामा कोरोना पोजेटिभ देखिएपछि उनको घर र टोल सिल गरिएको छ । बागमाराका २० घर शिल गरिएको प्रशासनले जनाएको छ । सिन्धुली अस्पतालमा २ दिन उपचार गराई पत्थरीको अप्रेशनका लागि पाटन अस्पताल गएकी ती महिलामा सोमबार कोरोना संक्रमण पुष्टि भएको हो ।
अप्रेशन पूर्व पाटन अस्पतालले ती महिलाको पिसिआर जाँच गराएको थियो । सोमबार विहान उनको रिपोर्टमा कोरोना संक्रमण पोजेटिभ देखिएपछि प्रमुख जिल्ला अधिकारी योगेन्द्र प्रसाद पाण्डेको नेतृत्वमा गएको सिन्धुली अस्पताल सहितको टोलीले घर गाउँ शिल गरेको हो ।
सिन्धुली अस्पतालमा असार १० गतेदेखि असार १२ गतेसम्म उपचार गराएकी ती महिलालाई पत्थरीको अप्रेशन गर्न अस्पतालले पाटन अस्पताल रिफर गरेको थियो ।
महिलाका परिवार, महिलाको उपचारमा संलग्न रहेका स्वास्थ्यकर्मी लगाएतको पिसिआर जाँचका लागि स्वाव संकलन गरि परिक्षणमा पठाउने तयारी भइरहेको सिन्धुली अस्पताल विकास समितिका अध्यक्ष प्रलाद कुमार पोखरेलले बताए ।
अस्पतालमा उपचार गराएकी महिलामा कोभिड १९ पुष्टि भएपछि सिन्धुली अस्पतालका स्वास्थ्यकर्मी तथा उनको सम्पर्कमा आएका व्यक्तिहरुको कन्ट्रयाक ट्रेसिङको काम सुरु गरिएको स्वास्थ्य कार्यालय सिन्धुलीले जनाएको छ ।
मंगलबार नै उक्त काम गरिने स्वास्थ्य कार्यालय सिन्धुलीका प्रमुख जितेन्द्र कुमार शाहले बताए । महिलाको कुनै पनि ट्राभल हिस्ट्री देखिएको छैन । ति महिलामा कोरोना संक्रमण कहाँबाट भयो खोजी सुरु गरिएको शाहले बताए । उनका अनुसार महिलामा समुदायमै वा काठमान्डौमा संक्रमण भयो भन्ने बारेमा खोजी सुरु गरिदै छ ।
