सिन्धुली । सुनकोशी गाउँपालिकाले आगामी वर्षको नीति तथा कार्यक्रम सार्वजनिक गरेको छ । गाउँपालिकाको सभाहल रामटारमा गाउँपालिका अध्यक्ष दिपा बोहोरा दाहालले नीति तथा कार्यक्रम प्रस्तुत गरेकी हुन ।
गाउँपालिकाले कोभिड १९ नियन्त्रण तथा रोकथामलाई मध्ये नजगर गरि र पोष्टमार्टमलाई समेत ध्यान दिई पन्ध्र शैयाको सुविधा सम्पन्न अस्पताल निर्माण गर्ने नीति ल्याएको छ । जसमा दक्ष चिकित्सकको समेत व्यवस्था गरिने छ ।
यस्तै कोभिड १९ नियन्त्रण गर्नका लागि विपद व्यवस्थापन कोषको रकम खर्च गर्ने नीति लिएको छ । यस्तै व्यवस्थित क्वारेन्टाईन निर्माण, स्वास्थ्यकर्मीको क्षमता अभिवृद्धि जस्ता नीति तथा कार्यक्रम सार्वजनिक गरेको छ ।
गाउँपालिकाले अनाथ बालबालिका र पालनपोषण गर्ने कोहि नभएका व्यक्तिलाई निशुल्क स्वास्थ्य बिमा, सबै स्वास्थ्य संस्थामा निशुल्क औषधिको व्यवस्था, आवश्यकता अनुसार स्वास्थ्य संस्था थप गर्ने, सुनकोशी गाउँपालिका भित्रका गर्भवति महिलालाई स्वास्थ्य संस्थामै सुत्केरी हुने व्यवस्था मिलाउन ‘सुरक्षित मातृत्व, सुनकोशी गाउँपालिकाको दायित्व’ को नारालाई अबलम्बन गरेको छ ।
यस्तै गाउँपालिकाले महिला उद्यमशिलता, महिला साक्षरता, स्थानीय उत्पादन तथा रोजगारमा महिलालाई जोड्न अनुदानको व्यवस्था लगाएतका कार्यक्रम ल्याएको छ । गाउँपालिका भित्रका बालबालिकालाई लक्षित गरि प्रत्येक वडामा बाल उद्यान निर्माण गरिने भएको छ । गाउँपालिकाले महिला हिंसा, बालश्रम बालविवाहमुक्त गाउँपालिका एक वर्षभित्रमा घोषणा गर्ने नीति लिईएको छ ।
गाउँपालिकाले सडक निर्माण, शिक्षा, युवा तथा खेलकुद नीति, सहकारी नीति लगाएतका नीति सार्वजनिक गरेको छ । गाउँपालिकाले आर्थिक वर्ष २०७७÷०७८ को बजेट भने बुधबार सार्वजनिक गर्ने भएको छ ।
