सिन्धुली । सिन्धुलीका सबै स्थानीय तहले आगामी वर्ष २०७७/०७८ को नीति तथा कार्यक्रम र बजेट समयमै ल्याउने भएका छन । उनीहरुले बजेट तथा नीति कार्यक्रमका सबै तयारी पूरा गरिएको जनाएका छन ।
कमलामाई नगरपालिका, दुधौली नगरपालिका, सुनकोशी गाउँपालिका, गोलञ्जोर गाउँपालिका, हरिहरपुरगढी गाउँपालिका, फिक्कल गाउँपालिका, तिनपाटन गाउँपालिका, मरिण गाउँपालिका र घ्याङलेख गाउँपालिकाले बजेट ल्याउने तयारी गरेका हुन । सबै स्थानीय तहले बुधबार अर्थात असार १० गते बजेट प्रस्तुत गर्ने तयारी गरिरहेका छन । गतवर्ष जस्तै स्थानीय सरकारको प्राथमिकतामा सञ्चार क्षेत्र भने पर्न सकेको छैन । सञ्चारको विकास र संरक्षणमा कुनै पनि स्थानीय तहले नीति, कार्यक्रम तथा बजेटमा समेटेका छैनन ।
वस्ती, वडास्तरबाट आएका योजना र लक्षित समूह लगाएत विषयगत क्षेत्रसँग लिईएको सुझावको आधारमा बजेट निर्माण गरिएको स्थानीय सरकारहरुले जनाएका छन । उनीहरुले महिला, दलित, जनजाती, अपांगता भएका व्यक्तिहरु, बालबालिका, जेष्ठ नागरिकलाई समेत बजेटमा समेटेका छन तथापी सञ्चार क्षेत्रसँग भने समन्वय नै गरिएको छैन । सञ्चारमा कुनै पनि नीति कार्यक्रम नबनाईएको र बजेट विनियोजन नगरिएको सबै स्थानीय तहका प्रमुख एवम् उपप्रमुखहरुले जनाएका छन ।
गत वर्षहरुका बजेट तथा कार्यक्रममा भौतिक पूर्वाधार निर्माणमा जोड दिएका स्थानीय सरकारले यस पटकको बजेटमा पहिलो प्राथमिकता स्वास्थ्यलाई दिई बजेट ल्याउने तयारीमा रहेका छन । कोरोना संक्रमण तथा व्यवस्थापन र उपचारमा स्वास्थ्यको बजेट केन्द्रीत हुने गरि नीति तथा कार्यक्रम तय गरेका छन । त्यस्तै रोजगारी, कृषि, पशुपालन, शिक्षा लगाएतका क्षेत्रमा प्राथमिकताका साथ बजेट विनियोजन गरेका छन ।
जिल्लाका स्थानीय तहले कृषि, रोजगारी, स्वास्थ्य, विकास निर्माण, शिक्षामा लक्षित गरि बजेट ल्याउने तयारी गरिरहेका छन । कमलामाई नगरपालिकाले करिब १ अर्व चालिस लाख माथिको बजेट ल्याउने तयारी गरेको नगरपालिकाका उपमेयर मञ्जु देवकोटाले बताएकी छिन । उनले जनाए अनुसार कमलामाई नगरपालिकाले स्वास्थ्य, कृषि, रोजगारी, शिक्षा, सहकारी र विकास निर्माणलाई लक्षित गरि बजेट विनियोजन गरेको छ । नगरपालिकाले लक्षित समूहमा पनि बजेट गरेको जनाएको छ । तथापी नगरपालिकाको नीति कार्यक्रमले सञ्चार क्षेत्रलाई समेट्न सकेको छैन ।
यस्तै दुधौली नगरपालिकाले स्वास्थ्य, कोभिड नियन्त्रण, रोकथाम तथा उपचार, पशु विकास, कृषि, रोजगार मूलक, पूर्वाधार विकास, शिक्षा, लक्षित वर्गका लागि बजेट विनियोजन गरिएको मेयर घनश्याम राउतले बताएका छन । राउतका अनुसार नगरपालिकाले १ अर्ब बढीको बजेट विनियोजन गरि बजेट ल्याउने तयारी गरेको छ । उक्त नगरपालिकाले पनि सञ्चारमा कुनै पनि कार्यक्रम तय गरेको छैन ।
यस्तै फिक्कल गाउँपालिका सिन्धुलीले स्वास्थ्य, कृषि, रोजगारमूलक कार्यक्रम, शिक्षा, पूर्वाधार विकासलाई लक्षित गरि कार्यक्रम तय गरिएको छ । गाउँपालिकाले करिब ३६ करोड बजेट विनियोजन गरि नीति तथा कार्यक्रम बनाएको गाउँपालिका उपाध्यक्ष पार्वती सुनुवारले बताएकी छिन । उनका अनुसार गत वर्षमा गाउँपालिकाले रेडियो सञ्चालन नीति बनाएको भए पनि त्यो कार्यान्वयन नभएको र यस वर्ष सञ्चारमा कुनै नीति कार्यक्रम तय गरिएको छैन । तथापी सरकारले तोकको लक्षित समूहहरुलाई भने बजेट विनियोजन गरिएको छ ।
यस्तै हरिहरपुरगढी गाउँपालिकाले करिब ४५ करोडको बजेट ल्याउने तयारी गरिरहेको छ । गाउँपालिका अध्यक्ष कार्साङ लामाका अनुसार गाउँपालिकाले पनि कृषि, स्वास्थ्य, पशुपालन, रोजगारी र विकास निर्माणलाई प्राथमिकता दिएको छ । उत्पादन र रोजगारीलाई जोड दिई बजेट ल्याउने तयारी भएको उनले बताए ।
सुनकोशी गाउँपालिका सिन्धुलीले ४२ करोडको हाराहारीमा बजेट ल्याएको छ । मंगलबार नै उक्त बजेट प्रस्तुत भएको छ । गाउँपालिकाले पेश गरेको नीति तथा कार्यक्रममा बजेटमा कृषि, स्वास्थ्य, पूर्वाधार विकास, रोजगारलाई प्राथमिकतामा राखिएको गाउँपालिका उपाध्यक्ष दिर्व सिंह मोक्तानले बताए । उनका अनुसार सञ्चार नीतिका रुपमा सार्वजनिक सुनुवाईलाई लिएको छ । तथापी पत्रकारिता र सञ्चारमाध्यम लक्षित कुनै पनि कार्यक्रम सार्वजनिक गरिएको छैन ।
यस्तै तिनपाटन गाउँपालिका सिन्धुलीले ६२ करोडको बजेट विनियोजन गरेको छ । असार १० गते गाउँसभामा पेश हुने बजेटको प्राथमिकता कोरोना भाइरस रोकथाम, उपचारलाई राखि स्वास्थ्यमा बजेट विनियोजन गरिएको छ । यस्तै कृषि, रोजगार, पूर्वाधार विकास, शिक्षा लगाएतका क्षेत्रलाई उच्च प्राथमिकता दिईएको गाउँपालिका अध्यक्ष कर्ण बहादुर थापाले बताए । उनले उक्त बजेटमा सञ्चार क्षेत्रको कुनै पनि कार्यक्रम राखिएको छैन ।
यस्तै घ्याङलेख गाउँपालिका सिन्धुलीले २५ करोडको हाराहारीको बजेट ल्याउने तयारी गरेको छ । गाउँपालिकाको मुख्य प्राथमिकता स्वास्थ्य, शिक्षा, कृषि, दिगो पूर्वाधार विकास रहेको छ । यो गाउँपालिकाले पनि लक्षित समुदायलाई केहि कार्यक्रममा समेट्ने प्रयास गरेको छ । तथापी सञ्चारमा भने कुनै पनि कार्यक्रम नबनाईएको उपाध्यक्ष दुर्गादेवी सुनुवारले बताईन ।
मरिण गाउँपालिकाले २७ करोड नजिक बजेट ल्याउन थालेको गाउँपालिका अध्यक्ष पानीराज बम्जनले बताए । उनका अनुसार स्वास्थ्य, शिक्षा, कृषि, भौतिक पूर्वाधारलाई प्राथमिकता दिएर बजेट विनियोजन गरिएको छ । उक्त बजेटमा पनि सञ्चार तथा मिडियालाई लाभ हुने कुनै पनि कार्यक्रम बनाईएको छैन । बम्जनले जनाए अनुसार मिडिया तथा छुटेका अन्य विषयलाई विविध शिर्षकको बजेटबाट सम्बोधन गर्न सकिने आधार भने रहन्छ । गोलञ्जोर गाउँपालिकाले पनि कृषि, स्वास्थ्य, पशुपालन, पूर्वाधार विकासको लागि प्राथमिकतामा राखि बजेट विनियोजन गरिन थालेको जनाएको छ ।
