सिन्धुली । सिन्धुली अस्पतालबाट कोभिड १९ जितेर ३ जना डिस्चार्ज भएका छन । अन्तिमपटक कोरोना परिक्षण गर्दा आइतबार रिपोर्ट नेगेटिभ आएका तीन जनालाई सिन्धुली अस्पतालले बेहुला जस्तो दुवोको माला, फूल र खादा सहित विदा गरेको छ ।
उनीहरुलाई विदा गर्दा बाग्मति प्रदेशसभा सदस्य प्रदीप कटुवाल, प्रमुख जिल्ला अधिकारी योगेन्द्र प्रसाद पाण्डे, अस्पताल विकास समिति सिन्धुलीका अध्यक्ष प्रलाद कुमार पोखरेल, अस्पतालका मेडिकल सुपरिटेन्डेन डा. लक्ष्मण खड्का सहित स्वास्थ्यकर्मीहरु, पत्रकारहरु लगाएतको उपस्थिति रहेको थियो ।
अस्पताल विकास समितिका अध्यक्ष पोखरेलले दुवोको माला लगाएर, सांसद प्रदीप कटुवालले खादा ओढाएर र पुष्पगुच्छा दिएर विदाई गरेका छन ।
सिन्धुुली अस्पतालको आइसोलेसनमा उपचाररत कनपा ११ तेस्रेका राजु लामा, तिनपाटन गाउँपालिका वडा नं. ३ खैरेनीका चन्द्र बहादुर गोले, कमलामार्ई नगरपालिका १४ मनोज गडाइली डिस्चार्ज भएका हुन । गडाईली जेठ २२ गते र अन्य २ जना जेठ २३ गतेबाट आइसोलेसनमा बसेका थिए । भारतबाट रोजगारीबाट फर्केपछि क्वारेन्टाईनमा बसेका उनीहरुमा परिक्षण गर्दा कोभिड संक्रमण देखिएको थियो ।
डिस्चार्ज भएकाहरुमा कुनै खालको कोरोनाको लक्षण भने नदेखिएको र औषधि खुवाउनु समेत नपरेको अस्पतालले जनाएको छ । अब सिन्धुली अस्पतालको आइसोलेसनमा १ जना संक्रमित उपचाररत छन । उनी १३ दिनदेखि अस्पतालमा बसेका छन । डिस्चार्ज भएका ३ जनासँगै परिक्षणका लागि नमुना पठाईएकोमा उनको रिपोर्ट भने पोजेटिभ आएको छ ।
उनीहरुलाई १४ दिन होम क्वारेन्टाईनमा बस्ने गरि अस्पतालले विदाई गरेको छ । उनीहरुको विदाई गर्दै अस्पताल विकास समितिका अध्यक्ष प्रलाद पोखरेलले उनीहरुलाई बधाई दिए ।
कोभिड १९ जितेका तीनै जनाले अस्पतालले आफुहरुलाई सम्मान जनक रुपमा अस्पतालमा राखेको बताए । उनीहरुले अस्पतालको बसाईमा पारिवारीक वातावरण बनेको कोरोना जितेका मनोज गडाईलीले बताए । उनले स्वास्थ्यकर्मीको उचित निगरानी र व्यवस्थापनको सहयोगले आफुहरुले कोरोना जित्न आत्मवल मिलेको भन्दै स्वास्थ्यकर्मी र अस्पताल व्यवस्थापनलाई धन्यावाद दिए ।
आइसोलेसनमा बसेका ३ जनाको खानाको व्यवस्था जिल्ला व्याडमिन्टन संघ सिन्धुलीले गरेको थियो ।
