सिन्धुली । सिन्धु बचत तथा ऋण सहकारी संस्थाले सिन्धुलीमा सोमबार रक्तदान कार्यक्रम गरेकोे छ । कोभिड १९ का कारण लकडाउन हुदा जिल्लामा रगत अभावले कसैले ज्यान गुमाउन नपरोस भनि रक्तदान कार्यक्रमको आयोजना गरिएको सहकारी संस्थाले जनाएको छ ।
कमलामाई नगरपालिका ६ धुरावजारमा सञ्चालित सहकारीले रेडक्रस सोसाईटी सिन्धुलीले सञ्चालन गरेको आकस्मिक रक्तसञ्चार केन्द्र (व्लड बैंक) मा रक्तदान कार्यक्रम सञ्चालन गरेको संस्थाका अध्यक्ष नवराज कोइरालाले बताए ।
जिल्लामा लामो समय देखि वन्दा वन्दिले नियमित रक्तदान गर्ने क्याम्पहरु संचालन हुन नसकिरहेको अवस्थाले गर्दा रगतको आपुर्ति पर्याप्त मात्रामा हुन नसकेको र मानवीय समवेदनासँग जोडिएको भएकाले रक्तदान कार्यक्रम गरिएको कोइरालाले बताए ।
उक्त कार्यक्रममा सोमबार १५ जनाले रक्तदान गरेका छन । विशेष गरि प्रसुति शल्यक्रिया र अन्य रक्त अल्पताका विरामीका लागि सिन्धुली अस्पतालमा रक्त सञ्चार केन्द्रले रगत खपत गर्दै आएको छ ।
नेपाल रेडक्रस सोसाईटी सिन्धुलीका सभापति अशोक श्रेष्ठले लकडाउनको समयमा कोरोना भाइरस संक्रमणको त्रासले रक्तदाताहरु आकस्मिक रक्तसञ्चार केन्द्रमा आई रक्तदान गर्न नसकेको अवस्थामा रक्तदान गर्ने अवसर मिलाएकोमा सहकारी नेतृत्वलाई धन्यावाद समेत दिएका छन ।
