सिन्धुली । रासायनिक मल कालोबजारी गरेको आरोपमा पक्राउ परेका जय वागवानी कृषि सहकारी संस्था लिमिटेडका सञ्चालक डुकेन्द्रराज दाहाल १ लाख ७० हजार धरौटी तिरी छुटेका छन । जिल्ला प्रशासन कार्यालय सिन्धुलीले २०७७ बैशाख २४ गते कमलामाई नगरपालिका वडा नंं. ६ मा रहेको सहकारीको गोदाममा सिल गरि रासायनिक मल सहित ४ वटा गाडीलाई नियन्त्रणमा लिई कालोबजारी गरेको आरोपमा मुद्दा चलाएको थियो । 
सहकारीका सञ्चालक दाहालले मल कालोबजारी गरि विक्री गरेको आरोपमा प्रशासनले सहकारीको गोदाम सिल गरिएको थियो भने सहकारीका सञ्चालकलाई प्रहरीले पक्राउ गरेको थियो । सहकारीले साल्ट ट्रेडिङको मल जिल्लाका किसानलाई विक्री नगरी बाहिर जिल्ला पठाउन थालेको आरोप सहकारीलाई लागेको थियो । उक्त आरोपमा जिल्ला प्रशासन कार्यालय सिन्धुलीले सहकारीको गोदाम सिल गर्नुका साथै मल ल्याएका ४ वटा सवारी साधन सहित ८४० बोरा रासायनिक मल समेत बरामद गरेको थियो ।
सहकारीका संचालक डुकेन्द्रराज दाहालले जिल्लाका किसानलाई मल बिक्री बितरण नगरी १७० बोरा युरिया मल प्रगतिशिल कृषी सहकारी संस्था रामेछापको खिम्तीमा बिक्री बितरण गरेको र बाँकी रहेको ६७० बोरा मल समेत रामेछाप पठाउने तयारी गरिरहेको अबस्थामा प्रशासनले ना७ख ९२४८ नं.को ट्रकबाट ४२० बोरा, ना५ख ५१९ नं.को ट्रकबाट २५० बोरा, ना७ख३६६७ नं. को ट्रकबाट २ बोरा डिएपी, ना ६ ख ७४७२ नं.को ट्रकबाट ५५ बोरा डि.ए.पि बरामद गरेको थियो ।
जय बागवानी कृषि सहकारी संस्था लिमिटेडका संचालक डुकेन्द्र दाहाललाई मल, खाद्य र बिभिन्न किटनाशक औषधीहरुको मुल्य बृद्धि गराई कालो बजारी गरेको आरोपमा मुद्दा चलाईएको थियो । जिल्ला प्रशासन कार्यालय सिन्धुलीले दाहाललाई बुधबार धरौटीमा रिहा गरेको हो । जिल्ला प्रशासन कार्यालय सिन्धुलीका सूचना अधिकारी उपेन्द्र न्यौपानेका अनुसार दाहाललाई जफत गरिएका सामान विक्री गर्न पाउने र आवश्यकता परेमा त्यति परिणामको सामान र सवारी साधन दाखिला गर्ने गरि दाहाललाई धरौटीमा छोडिएको हो ।
जिल्ला प्रशासन कार्यालय सिन्धुलीले धरौटीमा रिहा गर्ने आदेश दिएपछि जिल्ला प्रहरी कार्यालय सिन्धुलीले विहिबार सिल गरिएको गोदाम खोलेको डिएसपी श्याम बहादुर खत्रीले बताएका छन ।
