सिन्धुली । जिल्लामा लकडाउनको अवधिमा जिल्ला घरेलु हिंसाका घटनाहरु बढीरहेका छन तर ती घटनाहरु दर्ताको प्रक्रियामा गएका छैनन । जिल्ला प्रहरी कार्यालय सिन्धुलीमा लकडाउनको अवधिमा महिलाहरु घरेलु हिंसाका कारण पीडित भएका सूचनाहरु आउने गरेका भए पनि स्थानीय तहका न्यायीक समिति र प्रहरीमा उजुरी दर्ता भने भएका छैनन । जिल्ला प्रहरी कार्यालय महिला बालबालिका तथा जेष्ठ नागरिक सेवा केन्द्रमा लकडाउनमा १ वटा मात्र घरेलु हिंसाको घटना दर्ता भएको छ । स्थानीय तहमा रहेका न्यायीक समितिमा घरेलु हिंसाका घटनाहरु नै लकडाउनमा दर्ता भएका छैनन । 
तर यो अवधिमा महिलाहरुले हिंसा भोगिरहेको पाईएको छ । सिन्धुली अस्पतालमा रहेको एकद्धार संकट व्यवस्थापन केन्द्रको तथ्यांकलाई हेर्ने हो भने जिल्लामा १४ वटा घरेलु हिंसाको घटनाका पीडितले मनोसामाजिक परामर्श सेवा लिएको देखिएको छ । यसले लकडाउनको अवधिमा महिला हिंसामा वृद्धि भएको समेत देखाएको छ ।
विशेष गरि लकडाउनको अवधिमा सिन्धुलीमा मदिरा सेवनका कारण हुने कुटपिट तथा स्रोत साधनमाथिको बन्चितिकरणका घटना भएको पाईएको एकद्धार संकट व्यवस्थापन केन्द्र सिन्धुलीका घटना व्यवस्थापक सुनिता शर्माले बताईन । केन्द्रमा कुटपिटका ९ र साधन स्रोतबाट बञ्चित गरेका ५ गरि १४ वटा घटनामा मनोसामाजिक सेवा दिईएको शर्माले बताईन ।
स्थानीय तह अन्तर्गतका न्यायिक समितिमा भने यस्ता घटना भएको कुनै पनि उजुरी दर्ता भएका छैनन । कमलामाई नगरपालिका र फिक्कल गाउँपालिकाले वडा स्तरमा वडाध्यक्ष लगाएत जनप्रतिनिधिहरु, मेलमिलापकर्ताहरु र मनोपरामर्शकर्ताको सहयोगमा घरेलु हिंसाको घटना व्यवस्थापन गरिएको जनाएका छन तथापी कति घटना व्यवस्थापन भए भन्ने तथ्यांक भने उनीहरुसँग छैनन ।
