सिन्धुली । कमलामाई नगरपालिकाको न्यायीक समिति लैंगिक हिंसाको अवस्था बुझ्न सबै वडामा जाने भएको छ । कमलामाई नगरपालिकाको न्यायीक समितिले नगरपालिकामा लकडाउनको अवस्थामा लैंगिक हिंसाका घटना बढेको पाईएपछि सबै वडामा पुग्ने निर्णयमा पुगेको हो ।
लकडाउनमा नगरपालिकाभित्र महिला हिंसाको अवस्था कस्तो छ ? महिला बालबालिकामा मानसिक तथा शारीरिक असर कति परेको छ ? भनि स्थलगत अनुगमन गरिने नगरपालिकाका उपमेयर एवम् न्यायिक समितिका संयोजक मञ्जु देवकोटाले बताईन ।
न्यायीक समितिले आइतबार जिल्लाका लैंगिक हिंसाका सवालमा काम गर्ने निकाय, नगरपालिका भित्र काम गरिरहेका सबै वडाका मनोसामाजिक परामर्शकर्ता, सिन्धुली अस्पतालमा रहेको एकद्धार संकट व्यवस्थापन केन्द्र, नेपाल पत्रकार महासंघ लगाएतसँग छलफल गरेको थियो ।
उक्त छलफलमा नगरपालिकामा लकडाउनमा २३ वटा हिंसाका घटना एकद्धार संकट व्यवस्थापन केन्द्रमा आएको पाईएको छ भने कतिपय वडामा भएका लैंगिक हिंसाका घटनालाई स्थानीय जनप्रतिनिधि र मनोसामाजिक परामर्शकर्ताको सहजीकरणमा अन्तिम टुंगो लगाएको पाईएको हो । कमलामाई नगरपालिकाको न्यायीक समितिका संयोजक एवम उपमेयर मञ्जु देवकोटाको अध्यक्षतामा भएको बैठकमा महिला हिंसाका घटना बढेको पाईएपछि न्यायीक समिति गाउँमा जाने निर्णयमा पुगेको र सोमबारदेखि नै सबै वडामा पुग्ने भएको देवकोटाले बताएकी छिन ।
उपमेयर मञ्जु देवकोटाको नेतृत्वमा टोली नगरपालिकाको वडा नं. १ बाट अभियान थालनी गर्ने भएको हो । सामाजिक दुरी कायम गर्दै नगरपालिकाका सबै वडामा पुगिने र त्यहाको अवस्था र संकटमा परेका महिला, बालबालिका, जेष्ठ नागरिक, अपांगता भएका व्यक्तिका बारेमा जानकारी लिईने र उनीहरुको समस्या सुनेर काम गर्ने देवकोटाले बताईन ।
लैंगिक हिंसा र कोभिड १९ को प्रभावका बारेमा नगरपालिकामा आइतबार बसेको बैठकमा नगरपालिकाका मेयर खड्ग खत्रीले परामर्शकर्तालाई गाउँ गाउँमा पुगेर हिंसा हुन नदिन भूमिका खेल्न निर्देशनात्मक अनुरोध समेत गरेका छन । बैठकमा कमलामाई नगरपालिकाका उपमेयर मञ्जु देवकोटाले महिला हिंसाका घटनाको अवस्था बुझ्न र न्यायमा नागरिकको पहुँच पु¥याउनका न्यायीक समितिले १४ वटै वडामा पुगेर योजना बनाउन आवश्यक रहेको बताईन ।
