सिन्धुली । लकडाउनका कारण खाद्य संकटमा परेका अनाथ बालबालिकालाई कमलामाई नगरपालिकाले राहत उपलब्ध गराएको छ । शनिबार इन्सेक जिल्ला प्रतिनिधि विमला पाण्डेले बालबालिकाहरुलाई खाद्य संकट पर्न थालेको भनि नगरपालिकाका मेयर खत्रीलाई राहत उपलब्ध गराउन अनुरोध गरेकी थिइन ।
उनले अनाथालयको अवस्थाको अनुगमन गरि उनीहरुको अवस्थाबारे नगर प्रमुखलाई जानकारी गराएकी थिइन ।
नगरप्रमुख खत्रीले बालबालिकालाई खाद्यान्न संकट हुन नदिने प्रतिवद्धता जनाए अनुसार आइतबार शैलशिखर अनाथालय कमलामाई नगरपालिका वडा नं. ४ मा पुगेर खाद्यान्न सहयोग गरेका हुन ।
उनले नगरपालिकाको तर्फबाट ४० किलो चामल, ६ किलो दाल, २ लिटर तेल, २ किलो आयो नुन र २ वटा साबुन अनाथालयका संचालक विष्णु प्रसाद देवकोटालाई उपलब्ध गराए ।
इन्सेकको अनुगमनमा अनाथालय सञ्चालक विष्णु देवकोटाले लकडाउनका कारण समस्यामा परेको र सरकारले ध्यान नदिएको गुनासो गरेका थिए । उक्त अनाथालयमा १० जना बालबालिका रहेका छन । उनीहरुको लालन पालन र शिक्षाको व्यवस्था अनाथालय र संस्थागत तथा व्यक्तिगत सहयोगमा चलिरहेको छ । सिन्धुलीमा यो अनाथालय १० वर्षदेखि सञ्चालनमा रहेको छ ।
