सिन्धुली/प्लान नेपालको सहयोगमा ओरेक नेपालले सञ्चालन गरेको कार्यक्रमको शुक्रबार अनुगमन तथा मुल्यांकन गरिएको छ । बालिका पैरवी सञ्जाल कार्यक्रम मार्फत कमलामाई नगरपालिकाको ११ नं. वडामा सञ्चालित किशोरी समूहले गरेका हानिकारक परम्परागत अभ्यास अन्तर्गत व्यवहार परिवर्तनका कामको अनुगमन गरिएको हो ।
कमलामाई नगरपालिकाका उपप्रमुख मञ्जु देवकोटा, कमलामाई नगरपालिकाका ११ नं. वडा अध्यक्ष रामबहादुर थिङ, महिला विकास शाखाका अधिकृत इन्दिरा थापा, सामाजिक शाखाका वविन्द्रलाल माझी, नेपाल पत्रकार महासंघका उपाध्यक्ष बिमला पाण्डे, प्लान नेपालका कमला लामा, ओरेक नेपाल सिन्धुलीका संयोजक सपना थापा लगाएतले संयुक्त अनुगमन गरेका हुन ।
अनुगमनका क्रममा कमलामाई नगरपालिकाको ११ नं. वडामा क्रियाशिल दिपशिखा किशोरी समूहका किशोरीहरुसँग छलफल गरिएको छ । छलफलका क्रममा किशोरीहरुले १ वर्षमा गरेका कामहरु जानकारी गराएका थिए ।
समूहका अध्यक्ष लिला कार्कीको अध्यक्षता एवम् कमलामाई नगरपालिकाका उपप्रमुख मञ्जु देवकोटाको प्रमुख आतिथ्यतामा भएको कार्यक्रममा समूहका सदस्य पूजा थिङले समूहका गतिविधि तथा अपेक्षाहरु प्रस्तुत गरेकी थिइन ।
उनले प्रतिवेदनमा महिनावारीमा गरिने छुवाछुतमा कमी आएको, घरेलु तथा अन्य लैंगिक हिंसामा परेकाहरुलाई सहजीकरण गरिएको, मदिराजन्य विक्री वितरण र प्रयोगबाट आउने समस्याबारे जनचेतना जगाईएको, समान कामका लागि समान ज्यालाका लागि सहजीकरण गरिएको, बालविवाह विरुद्ध सचेतना जगाईएको र ६ वटा बालविवाह रोकिएको लगाएतका विषयमा जानकारी गराएकी थिइन ।
कार्यक्रममा बोल्दै कमलामाई नगरपालिकाका उपप्रमुख मञ्जु देवकोटाले महिला हिंसा गराउने कारणमा सामाजिक सञ्जाल र मदिरा भएको भन्दै सचेतना जगाउन आवश्यक रहेको बताईन । उनले किशोरीहरुलाई प्रभावकारी अभियानहरु सञ्चालन गर्न आग्रह गर्दै समूहको दिगोपनाका लागि स्थानीय सरकारले सहयोग गर्ने बताईन ।
कार्यक्रममा बोल्दै कमलामाई नगरपालिका वडा नं. ११ का अध्यग राम बहादुर थिङले हिंसा पीडित महिलाहरुलाई एकद्धार संकट व्यवस्थापन केन्द्रमा पठाउन सहजीकरण गर्न किशोरी समूहलाई आग्रह गरेका छन । उनले वडाको योजना छनौट प्रक्रियामा आफ्ना योजना र कार्यक्रम ल्याउन आग्रह गर्दै सहकार्यका लागि वडा कार्यालय तयार रहेको बताए ।
प्लान नेपालका कमला लामाले किशोरीको दिगो विकास र स्थायीत्वका लागि नगरपालिकाले स्वामित्व लिनुपर्ने बताईन । कार्यक्रममा सहभागिहरुले समूहको कामको दिगोपना र अभियानलाई दिर्घकालिन बनाउन सहकार्यको आवश्यकता रहेको बताएका छन । कार्यक्रमको सहजीकरण ओरेकका अनिता पहाडीले गरेकी थिइन ।
