सिन्धुली । सिन्धुलीको चियाबारीमा रहेका होटलमा खाद्य स्वच्छता सम्बन्धि स्टिकर टाँसिएको छ । विपि राजमार्ग अन्र्तगत सिन्धुलीको कमलामाई नगरपालिका २ को चियावारीमा रहेका २१ वटा होटलहरुमा बुधबार पहेंलो स्टिकर टाँसिएको हो । खाद्य प्रविधि तथा गुण नियन्त्रण डिभिजन कार्यालय सिन्धुलीले होटलहरुमा खाद्य स्वच्छता सम्बन्धि स्टिकर टाँसेको र अनुगमनमा चियावारीका सबै होटल सामान्यमा परेको जनाएको छ । होटलहरुमा स्टिकर टाँस्न चार प्रकारका स्टिकर ल्याएकोमा सवै होटलमा पहेंलो रंगको मात्र स्टिकर टाँसिएको खाद्य प्रविधि तथा गुण नियन्त्रण डिभिजन कार्यालय सिन्धुलीका प्रमुख प्रेम अर्यालले बताए ।
कार्यालयको अनुगमनमा त्यस क्षेत्रका होटलहरुमा खाना खान अयोग्य जस्तै रहेको अर्थात सामान्य अवस्थामा रहेको र सुधार गर्नुपर्ने अवस्था रहेको पाईएको अर्यालले जानकारी दिए । तीनवटा हरियो स्टिकरले उत्कृष्ट र दुईवटा स्पहेलो रंगको होटल सरसफाईको दृष्टिकोणले सामान्य भएकाले सेवाग्राहिले खानाखानु पुर्व सोच्नु पर्ने उनले बताए ।
चियाबारीमा मुल्याङकनमा दुई वटा होटलले ६० र ६१ अंक प्राप्त गरेको हरियो स्टिकर प्राप्त गर्न उन्मुख भए पनि खाद्य स्वच्छताको दृषिकोणले योग्य नभएको र अरु होटलले ५० देखी ५५ अंक मात्र प्राप्त गरेको पाईएको छ ।
तीनवटा हरियो स्टिकरहरु खाद्य स्वच्छताको स्तरमामा क–अतिउत्तम, दुईवटा हरियो स्टिकर ख–उत्तम, एक वटा हरियो स्टिकर ग–सन्तोषजनक र पहेलो रंगको स्टिकरलाई घ–सामान्य मानिन्छ छन् । तीनवटा हरियो स्टिकर रहेका होटलमा खाना निर्धक्कका साथ खान सकिने र पहेलोमा खाना खान नहुने भन्ने जनाउँछ ।
स्टिकर टाँस गर्नका लागि होटलको ५० वटा सूचकहरूका आधारमा स्तरीकरण गरिन्छ । १०० अंकमा होटलको मूल्यांकन गरि प्राप्त अंकका आधारमा होटलको स्तर निर्धारण गरिएको कार्यालय प्रमुख अर्यालले बताए । उनका अनुसार १०० अंकमा हुने मुल्याङकनमा कुल अंकको ९० भन्दा माथि अंक प्राप्त गर्ने होटलले अतिउत्तम लेखिएको तीन वटा स्टार भएको हरियो रंगको स्टिकर पाउने, ८० देखि ८९ अंक प्राप्त गर्ने होटलले पनि हरियो रंगको दुई वटा स्टार भएको उत्तम स्टिकर पाउने, ६४ देखि ७९ सम्म अंक प्राप्त गर्ने होटलले एउटा मात्र स्टार भएको हरियो रंगको सन्तोषजनक लेखिएको स्टिकर पाउनेछन्, र ५० देखि ६४ सम्म अंक प्राप्त गर्ने होटलले पहेंलो रंगको स्टिकर पाउने प्रावधान छ । त्यो भन्दा कम नम्बर ल्याउने होटल कार्यालयले बन्द गर्नुपर्ने हुन्छ ।
कुन कुन होटलले कति नम्बर पाए ?
चियाबारी र आसपासका होटलको मुल्यांकनमा होटल कोशी टापु होटलले ५७, रोशन होटलले ५२, भद्रकाली होटल एण्ड गेण्ट हाउसले ६१, होटल एस एम एसले ५५, शिशिर होटलले ५४, पुर्वेली होटलले ५४, चण्डिका होटलले ५३, होटल ग्रिण ल्याण्डले ५१, चियाबारी खाजाघरले ५२, सन्तोष खाजाघर एण्ड होटलले ५८, होटल सृष्टि एण्ड खाजाघरले ५४, होटल सेल्फी एण्ड रेस्टुरेन्टले ५०, के.बि.हेटलले ५०, समिर खाजाघरले ५०, लोकल कुखुरा एण्ड खाजाघरले ६०, चौतारी भान्सा घरले ५४, सगरमाथा होटल एण्ड लजले ५६, दर्शण होटल एण्ड लजले ६०, ग्रेस होटल एण्ड खाजा घरले ५९, न्यु घुम्ती भान्साघरले ५९ र बिन्दास कटेजले ५३ अंक पाएका छन् ।
