सिन्धुली । प्रदेश नं. ३ का सांसद विनोद खड्काले जिम्मेवार निकायमा बसेकाहरुका कारण हुने ढिलासुस्ती र अपारदर्शिताका कारण भ्रष्टाचार बढिरहेको बताएका छन । उनले सोमबार सिन्धुलीमाढीमा ट्रान्सपरेन्सी इन्टरनेशनल जिल्ला कार्यालय सिन्धुलीको आयोजनामा भएको भुकम्पपछिको पुननिर्माण र पुनस्र्थापनामा सदाचार कार्यक्रमको प्रभाव र भावी योजनाका सम्बन्धमा सुझाव संकलन तथा छलफल कार्यक्रममा बोल्दै उनले यस्तो बताएका हुन ।
उनले भुकम्पपछिको पुननिर्माणमा वास्तविक पीडितले राहत नपाएको र धनी मान्छेहरुले लाभग्राही सूचिमा परेको भन्दै कर्मचारी र प्राविधिकहरुको लापरवाहिका कारण पुननिर्माणमा समस्या आएको बताए ।
भुकम्प प्रभावित सेवाग्राहीहरुलाई समयमा उचित सेवा दिन नसको बताउँदै राज्यले नै समयसिमा, दायरा र भूमिकामा राज्यका निकायले ध्यान दिन नसकेको र जिम्मेवार नबनेको बताए । उनले भुकम्पपछिको पुननिर्माणमा राज्यलाई सुधारका लागि झक्झकाउने काम गर्न पनि ट्रान्सपरेन्सी इन्टरनेशनललाई सुझाव दिएका छन । कार्यक्रममा जिल्ला समन्वय समितिका संयोजक शंकरराज बर्मा तिवारीले स्थानीय तह, जिल्ला समन्वय समिति तथा अन्य सरोकारवाला निकायसँगको संयुक्त अनुगमन गरि पुननिर्माणमा भएका समस्यालाई सुल्झाउन तर्फ लाग्नुपर्नेमा जोड दिए । यस्तै कमलामाई नगरपालिकाका मेयर खड्ग बहादुर खत्रीले बजेट, नीति तथा कार्यक्रममा सबै निकायहरु पारदर्शी र जवाहदेहिता आवश्यक रहेको बताए ।
कार्यक्रममा सहायक प्रमुख जिल्ला अधिकारी विजया प्रसाईंले सेवा प्रदायकलाई मात्र नभई सेवाग्राहीलाई पनि सिस्टममा ल्याउन सकिएमा समस्या कम हुने बताइन । उनले ट्रान्सपरेन्सीले नै पारदर्शिताको सुरुवात गर्न समेत सुझाव दिइन । कार्यक्रममा ट्रान्सपरेन्सी इन्टरनेशनल सिन्धुलीकी अधिकृत गंगा घिमिरेले जिल्लामा बजार अनुगमन, सार्वजनिक सुनुवाई पुननिर्माणका सरकारी भवनको अनुगमन, गुनासो संकलन जस्ता कार्यक्रमले गुणस्तरीय पुननिर्माणमा सहयोग पुगेको बताईन । उनले नीतिगत छलफल, व्यवहारिक छलफलले पनि सरोकारका निकायलाई जिम्मेवार बनाएको बताईन ।
