सिन्धुली । दुई बालिकालाई मदिरा सेवन गरि रातीको साढे १२ बजे कोठामा गई यौन दुव्र्यवहार गर्ने एक शिक्षक विरुद्ध जिल्ला प्रहरी कार्यालय सिन्धुलीमा मुद्दा दर्ता भएको छ । बाल सञ्जालको सक्रियतामा फिक्कल गाउँपालिका वडा नंं ३ घर भई सोहि ठाउँको माध्यमिक विद्यालय रातमाटा खोलागाउँमा प्राथामिक तहमा पढाउने शिक्षक ४५ वर्षिय चिरञ्जीवी पहाडीलाई बाल यौन दुव्र्यवहार गरेको भन्दै जिल्ला प्रहरी कार्यालय सिन्धुलीमा आइतबार मुद्दा दर्ता भएको हो ।
शिक्षक पहाडीलाई उनैले पढाएका १४ र १५ वर्षका पूर्व छात्राहरुलाई दुव्र्यवहार गरेको आरोप लागेको छ । पीडित बालिकाहरुका बाबु तथा फुपाजुसँग बसी पीडितकै घरमा मदिरा सेवन गरेको र बाबु अर्धचेत भएपपछि बालिकाहरु सुतेको कोठामा गई ढोका खोल्न लगाई दुव्र्यवहार गरेको भन्दै पीडितले मुद्दा दिईएको जिल्ला प्रहरी कार्यालय सिन्धुलीका एसपी चक्र बहादुर सिंहले बताए ।
पीडक पहाडी फरार रहेको र उक्त घटनाको अनुसन्धान सुरु गरिएको सिंहले जानकारी दिए । उनका अनुसार घटनाको बारेमा बैशाख १४ गते नै वडाध्यक्ष टेक बहादुर रजन मगरलाई पीडित पक्षले लिखित जानकारी गराएका थिए । घटनामा राजनीतिक दवाव आएको र उचित छानविनमा समस्या भएको एसपी सिंहले बताए ।
एसपी सिंहका अनुसार बालिकाहरुले हार गुहार गरेपछि गाउँलेहरु जम्मा भएपछि पहाडी भागेको घटनास्थल अध्ययनबाट खुल्न आएको थियो । उनले भने, ‘पीडितले जिल्ला प्रहरी कार्यालयमा शुक्रबार नै मुद्दा ल्याएका थिए, घटना शंकास्पद लागेपछि स्थलगत पुगेर अनुसन्धान गरेपछि मात्र आइतबार मुद्दा दर्ता गरिएको छ ।’
